Almaty ákimdigi Vladımır Jırınovskııge eskertkish qoıýǵa qatysty pikir bildirdi, dep habarlaıdy Dalanews.kz.

"Almaty qalasynyń mádenıet basqarmasyna V.Jırınovskııge eskertkish ornatý týraly ótinish túsken joq. Almaty qalasynyń tarıh jáne mádenıet eskertkishterin qorǵaý jónindegi komısıa tıisti usynysty qarastyrǵan joq, deıdi Almaty ákimdiginiń ókilderi.

Eske salaıyq, buǵan deıin reseılik depýtattar saıasatkerdiń 80 jyldyǵyna oraı Almatyda oǵan eskertkish ornatýdy usynǵanyn habarlaǵan edik. 

Mereıtoıdy atap ótýge arnalǵan qujattarda Almaty Jırınovskııdiń “kishi otany” retinde kórsetilgen. Jobany Reseı Memlekettik Dýmasynyń tóraǵasy Vácheslav Volodın qadaǵalaıdy.

Aıta keteıik, 2005 jyly Vladımır Jırınovskıı Qazaqstandy “eshqashan tarıhta bolmaǵan memleket” dep ataǵan málimdemesinen keıin, el bıligi Vladımır Jırınovskııdi Qazaqstanǵa kirýge jáne el aýmaǵynda bolýǵa tyıym salynǵan tulǵa dep jarıalaǵan bolatyn.