Almaty qalasynda otbasy qaýipsizdigin qamtamasyz etý jáne turmystyq zorlyq-zombylyqtyń aldyn alý baǵytynda birqatar jedel-profilaktikalyq is-sharalar ótip jatyr. Onyń ishinde “Zorlyq-zombylyqsyz otbasy” jáne “Turǵyn úi” aktsiialary erekshe mańyzǵa ie boldy, dep habarlaidy Dalanews.kz.
Bul bastamalardyń negizgi maqsaty – otbasylyq-turmystyq qatynastar salasyndaǵy quqyqbuzýshylyqtardyń aldyn alý jáne áleýmettik turǵyda qiyn jaǵdaidaǵy azamattarǵa der kezinde kómek kórsetý.
Túrksib aýdandyq politsiia basqarmasynyń bastyǵy Dýman Aýhadievtiń aitýynsha, mundai is-sharalar turmystyq zorlyq-zombylyqtyń aldyn alýdaǵy tiimdi qural bolyp sanalady.
«Biz qaýip-qater tobyndaǵy otbasylarmen maqsatty túrde jumys júrgizip kelemiz. Politsiia qyzmetkerleri men aýdan ákimdigi birlesip, áleýmettik jaǵdaiy tómen, balalarymen jaldamaly páterde turatyn azamattardy aralap, olarǵa qajetti azyq-túlik jiyntyqtaryn jetkizdi», – dedi ol.
Sonymen qatar, ýchaskelik inspektorlar men áielderdi zorlyq-zombylyqtan qorǵaý qyzmetkerleri turmystyq janjaldyń aldyn alý boiynsha túsindirý jáne keńes berý jumystaryn kúsheitti.
Al “Turǵyn úi” jedel aldyn alý is-sharasy aiasynda politsiia qyzmetkerleri profilaktikalyq esepte turǵan azamattardyń turǵylyqty mekenjailaryn tekserip, qorǵaý uiǵarymdary men erekshe talaptardyń saqtalýyn baqylaýǵa aldy.
Almaty qalasy PD jergilikti politsiia qyzmeti basqarmasy bastyǵynyń orynbasary Aitan Eleýsizov atap ótkendei:
«Bizdiń basty mindetimiz – qaitalama quqyqbuzýshylyqtardyń aldyn alý jáne ómirlik qiyn jaǵdaiǵa tap bolǵan otbasylarǵa naqty kómek kórsetý».
Tekserý barysynda alkogoldi shamadan tys paidalanǵan jáne qorǵaý uiǵarymyn buzǵan tulǵalarmen profilaktikalyq áńgime ótkizildi. Bir azamat erekshe talaptardy saqtamaǵany úshin 10 táýlikke ákimshilik qamaýǵa alyndy.
Politsiia departamenti almatylyqtardy turmystyq zorlyq-zombylyq derekteri týraly únsiz qalmai, tiisti organdarǵa habarlaýǵa shaqyrady. Aldyn alý sharalary qala aýmaǵynda turaqty túrde jalǵasady.
