Eske salsaq, Qazaqstan Prezidenti Qasym-Jomart Toqaev Dostyq úileri barlyq azamattyq qoǵam institýttary úshin resýrstyq ortalyqtarǵa ainalýy tiis ekenin atap ótti.
Almaty – kóptegen erekshelikteri jáne túrli ólshemderi boiynsha biregei qala. Eń aldymen, etnikalyq, mádeni ártúrlilik boiynsha. Sondyqtan megapolis ákimi Baqytjan Saǵyntaevtyń tapsyrmasy boiynsha ashylǵan qalalyq Dostyq úii etnosaralyq dialog, ózara is-qimyl jáne qoǵamdyq uiymdarmen yntymaqtastyq alańyna ainalady. Endi 36 etnomádeni birlestik bir shańyraq astynda bolady.
Jarokov kóshesinde ornalasqan keń ǵimaratta dástúrlerdi, tilderdi, mádenietti saqtaý úshin barlyq jaǵdai jasalǵan. 24 kabinet, konferents-zal, til synyby, bi zaly, mediatsiia jáne qoǵamdyq kelisim keńesi kabinetteri, sondai-aq qoǵamdyq qabyldaý bólmesi qarastyrylǵan.
– Almaty ákimi Baqytjan Saǵyntaevtyń bizge, qalalyq Assambleiaǵa turaqty qoldaýynyń arqasynda kópten kútken ózimizdiń qalalyq Dostyq úiimiz ashylady. Bul Qazaqstan Respýblikasy Táýelsizdiginiń 30 jyldyǵynda jáne Tuńǵysh Prezident kúnine orailastyrylǵan. Osy múmkindikti paidalana otyryp, búkil qalalyq Assambleia atynan qalalyq etnomádeni birlestikter úshin osy mereitoilyq syilyq úshin shynaiy alǵysymdy bildirgim keledi, – dedi N. Niiazova.
Almaty qalasy QHA Qoǵamdyq kelisim keńesiniń tóraǵasy Ahmetjan Shardinov ortaq shańyraq astyndaǵy etnomádeni ortalyqtar megapolistegi etnosaralyq kelisimdi saqtaý úshin odan ári jumys isteitinin aitty.
– Dostyq úii – bul bizdiń qoǵamda ornyqqan úilesim men berik beibitshilikti beineleitin simvoldyq nyshan. Sondyqtan onyń ashylýy qalamyzda beibitshilik pen kelisimniń saqtalýyna yqpal etetin taǵy bir faktor bolýy tiis. Qazaqstanda turatyn barlyq ult ókilderiniń arasyndaǵy beibitshilik turaqty ekonomikalyq ósimniń, Áleýmettik jáne mádeni progrestiń negizi bolyp tabylady, – deidi A. Shardinov.
– Qalalyq Dostyq úiiniń ashylýy qazaqstandyq biregeilik pen jalpyulttyq birlikti nyǵaitýǵa, Qazaqstannyń etnostyq toptarynyń dástúrlerin, tilderin, mádenietterin saqtaý, etnosaralyq toleranttylyq pen qoǵamdyq kelisimdi qalyptastyrý boiynsha ortaq mindetterdi sheshýge, sondai-aq Assambleianyń maqsattary men mindetterine qol jetkizýde etnomádeni birlestikterdiń kúsh-jigerin biriktirýge yqpal etedi, – dedi ol.
