Almaty qalasyndaǵy Medeý aýdanynda jol jıegindegi shópterdiń jasyl túske boıalǵany týraly vıdeo áleýmettik jeli qoldanýshylary arasynda qyzý talqylandy. Bul jaıtqa qatysty qala ákimdigi resmı túsinikteme berdi,- dep habarlaıdy Dalanews.kz

Ákimdiktiń habarlaýynsha, jaýyn-shashynnyń az bolýyna baılanysty shóp jamylǵysynyń estetıkalyq kórinisin saqtaý úshin tyńaıtqysh qosylǵan arnaıy boıaǵysh qoldanylǵan. Medeý aýdanynyń ákimi Erkebulan Orazalın shóp boıalǵan aýmaqqa arnaıy baryp, jaǵdaıdy baqylap shyqqanyn málimdedi.

— Bıyl qalada jaýyn az, aýa raıy óte qurǵaq boldy. Osyǵan baılanysty biz klımattyq jaǵdaıy uqsas elderdegi tájirıbeni zerttedik. Boıaý retinde qoldanylǵan zat — organıkalyq pıgmentter negizinde jasalǵan, ýly emes, adam men janýar úshin qaýipsiz qural. Ol AQSH, BAÁ, Ispanıa men Ońtústik Koreıa sıaqty ystyq elderde jıi qoldanylady, — dedi aýdan ákimi.

Orazalınniń aıtýynsha, bul tájirıbe avtomattandyrylǵan sýarýdan tolyq bas tartý degendi bildirmeıdi. Jasyl tústi boıaǵysh tek keıbir jerlerde estetıkalyq kórinis úshin qoldanylady.

— Bul — biz úshin jańa tehnologıa. Qazir onyń tıimdiligin baıqap kórýdemiz. Al kógaldarǵa kútim jasaý, sýarý jáne qýańshylyqqa tózimdi ósimdikterdi otyrǵyzý jumystary jalǵasady, — dep atap ótti ákimdik.

Aıta keteıik, bul ónimniń arnaıy sertıfıkaty bar jáne qazirgi tańda qalada qoldaný qaýipsiz dep tanylǵan. Sheshimniń basty maqsaty — qala kelbetiniń tartymdylyǵyn saqtaý.