Erbolat Dosaev 1931-33 jyldardaǵy asharshylyq qurbandaryna arnalǵan eskertkishke gúl shoǵyn qoiý rásimine qatysty, dep habarlaidy Dalanews.kz.
Almaty ákimi Erbolat Dosaev 31 mamyr – saiasi qýǵyn-súrgin jáne asharshylyq qurbandaryn eske alý kúni 1931-33 jyldardaǵy asharshylyq qurbandaryna arnalǵan eskertkishke gúl shoǵyn qoiý rásimine qatysty. Is-shara «Qaraǵaily» skverinde ótip, Qazaqstannyń jappai saiasi qýǵyn-súrgin qurbandary qaýymdastyǵynyń, «Ádilet» tarihi-aǵartýshylyq qoǵamynyń basshylary men 1938 jyly qýǵyn-súrginge ushyraǵan qazaq teatr óneriniń negizin qalaýshylardyń biri Jumat Shaninniń nemeresi Raihan Shanina sóz sóiledi.
Gúl shoǵyn qoiý rásimine qýǵyn-súrginge ushyraǵan jandardyń urpaqtary, qala halqy, 1986 jyly Jeltoqsan oqiǵasyna qatysýshylar men jastar uiymdarynyń ókilderi de qatysty.
Qatysýshylar qýǵyn-súrginge ushyraǵandardy bir minýt únsizdikpen eske alyp, eskertkishke gúl shoǵyn qoidy.
Saiasi qýǵyn-súrgin jáne asharshylyq qurbandaryn eske alý kúni Qazaqstanda 1997 jyldan beri atalyp keledi. Ótken ǵasyrdyń birinshi jartysynda 100 myńnan astam adam qýǵyn-súrginge ushyrap, onyń 25 myńnan astamy atý jazasyna kesildi. Olardyń ishinde Qazaqstannyń kórnekti ǵylym jáne mádeniet qairatkerleri Ahmet Baitursynov, Álihan Bókeihanov, Mirjaqyp Dýlatov, Muhamedjan Tynyshpaev, Maǵjan Jumabaev, Sáken Seifýllin jáne t.b. bar.
Bul kúni qalada konferentsiia, dóńgelek ústel, tarihi-aǵartýshylyq dáris, teatrlandyrylǵan qoiylym, kitaphanalardaǵy foto jáne kitap kórmesi, jastardyń ziialy qaýym ókilderimen kezdesýi syndy túrli eske alýǵa arnalǵan is-sharalar ótedi.
