الماتىدا ساياسي قۋعىن-سۇرگىن جانە اشارشىلىق قۇرباندارىن ەسكە الدى

Dalanews 31 مام. 2024 11:05 1692

ەربولات دوسايەۆ 1931-33 جىلدارداعى اشارشىلىق قۇرباندارىنا ارنالعان ەسكەرتكىشكە گۇل شوعىن قويۋ راسىمىنە قاتىستى،  دەپ حابارلايدى Dalanews.kz. 


الماتى اكىمى ەربولات دوسايەۆ 31 مامىر – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى 1931-33 جىلدارداعى اشارشىلىق قۇرباندارىنا ارنالعان ەسكەرتكىشكە گۇل شوعىن قويۋ راسىمىنە قاتىستى. ءىس-شارا «قاراعايلى» سكۆەرىندە ءوتىپ، قازاقستاننىڭ جاپپاي ساياسي قۋعىن-سۇرگىن قۇرباندارى قاۋىمداستىعىنىڭ، «ادىلەت» تاريحي-اعارتۋشىلىق قوعامىنىڭ باسشىلارى مەن 1938 جىلى قۋعىن-سۇرگىنگە ۇشىراعان قازاق تەاتر ونەرىنىڭ نەگىزىن قالاۋشىلاردىڭ ءبىرى جۇمات ءشانيننىڭ نەمەرەسى رايحان شانينا ءسوز سويلەدى.

گۇل شوعىن قويۋ راسىمىنە قۋعىن-سۇرگىنگە ۇشىراعان جانداردىڭ ۇرپاقتارى، قالا حالقى، 1986 جىلى جەلتوقسان وقيعاسىنا قاتىسۋشىلار مەن جاستار ۇيىمدارىنىڭ وكىلدەرى دە قاتىستى.
قاتىسۋشىلار قۋعىن-سۇرگىنگە ۇشىراعانداردى ءبىر مينۋت ۇنسىزدىكپەن ەسكە الىپ، ەسكەرتكىشكە گۇل شوعىن قويدى.
ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى قازاقستاندا 1997 جىلدان بەرى اتالىپ كەلەدى. وتكەن عاسىردىڭ ءبىرىنشى جارتىسىندا 100 مىڭنان استام ادام قۋعىن-سۇرگىنگە ۇشىراپ، ونىڭ 25 مىڭنان استامى اتۋ جازاسىنا كەسىلدى. ولاردىڭ ىشىندە قازاقستاننىڭ كورنەكتى عىلىم جانە مادەنيەت قايراتكەرلەرى احمەت بايتۇرسىنوۆ، ءاليحان بوكەيحانوۆ، ءمىرجاقىپ دۋلاتوۆ، مۇحامەدجان تىنىشپايەۆ، ماعجان جۇمابايەۆ، ساكەن سەيفۋللين جانە ت.ب. بار.

بۇل كۇنى قالادا كونفەرەنسيا، دوڭگەلەك ۇستەل، تاريحي-اعارتۋشىلىق ءدارىس، تەاترلاندىرىلعان قويىلىم، كىتاپحانالارداعى فوتو جانە كىتاپ كورمەسى، جاستاردىڭ زيالى قاۋىم وكىلدەرىمەن كەزدەسۋى سىندى ءتۇرلى ەسكە الۋعا ارنالعان ءىس-شارالار وتەدى.


ۇسىنىلعان
سوڭعى جاڭالىقتار