QMA Almaty qalasy boıynsha departamenti «NBC TV» qarjy pıramıdasyn qurý jáne oǵan basshylyq etý faktisi boıynsha tergeýdi aıaqtady, dep habarlaıdy Dalanews.kz.
Tergeý amaldaryna saı, 2025 jyly kúdikti ınternettegi «www.nbcms.com» resýrsy jáne WhatsApp messendjeri arqyly azamattardy tarta otyryp, ınvestısıalyq onlaın-joba retinde búrkemelengen qarjy pıramıdasyn uıymdastyrǵan.
Atalǵan messendjer chattarynda («Dıskýssıonnaıa grýppa NBC Charlotte», «NBCUniversal Media LLC» jáne basqa) 200-den astam adam bolǵan.
Qatysýshylarǵa qysqa beınerolıkterdi (fılm treılerlerin) qaraǵany úshin tabys tabý syltaýymen ınvestısıa salý usynylǵan.
Jobaǵa qatysý úshin quny 11 000-nan 160 000 teńgege deıingi ınvestısıalyq paketterdi satyp alý talap etilgen.
Bul rette táýligine 5–10%-ǵa deıin (aıyna 150%-dan astam) tabys ýáde etilgen, al mundaı tólemder tek jańa salymshylardyń qarajaty esebinen qamtamasyz etilgen.
Sonymen qatar tartylǵan tulǵalardyń salymynan 10%-ǵa deıin syıaqy tólenetin referaldyq júıe, sondaı-aq ekinshi jáne úshinshi deńgeıdegi qatysýshylar úshin qosymsha bonýstar qarastyrylǵan.
Zańdy qyzmettiń kórinisin qalyptastyrý maqsatynda uıymdastyrýshylar áleýmettik jeliler men messendjerlerde jarnama taratqan, jalǵan qujattardy jarıalaǵan, jasandy tabys kórsetkishterin kórsetken, blogerlerdi tartqan jáne taqyryptyq chattardy júrgizgen.
Qarajattardy qabyldaý jeke tulǵalardyń shottaryna júrgizilip, keıin R2R operasıalary arqyly krıptovalútaǵa aıyrbastalyp, anonımdi ámıandarǵa jiberilgen.
Sot sanksıasymen 1 057 599 USDT (Tether) kólemindegi krıptovalútaǵa tyıym salyndy, bul shamamen 528,5 mln teńgeni quraıdy.
Kúdiktige qatysty elden shyqpaý jáne tıisti minez-qulyq týraly qolhat túrindegi bultartpaý sharasy qoldanyldy.
Qylmystyq is sotqa joldandy.
Qazaqstan Respýblıkasy Qylmystyq-prosestik kodeksiniń 201-babyna sáıkes ózge aqparat jarıa etýge jatpaıdy.
