Almaty ákiminiń orynbasary Beibit Shahanov Parijdegi jazǵy Olimpiada oiyndarynda medal jeńip alǵan sportshylarǵa páter kiltterin tabys etti,- dep habarlaidy Dalanews.kz
Bes sportshy jańa páter iegerleri atandy. Sporttyq gimnastikadan Olimpiadanyń kúmis júldegeri Nariman Qurbanov eki bólmeli páter aldy.
Qola júldegerler — bokstan sportshy Nazym Qyzaibai men atqysh Islam Sátbaev bir bólmeli páter iegerleri atandy.
Qola medal iegerleri, dziýdoshy Gýsman Qyrǵyzbaev jáne pnevmatikalyq myltyqtan atý sportshysy Aleksandra Le jattyǵý jiyndary men halyqaralyq jarystarda. Olarǵa páterler kiltteri Almatyǵa oralǵannan soń beriledi.
«Sizdiń jeńisterińiz-kóp jylǵy qajyrly eńbektiń nátijesi jáne sportshylardyń jańa býyny úshin laiyqty úlgi. Almaty Sizderdiń jetistikterińizdi joǵary baǵalaidy jáne Sizderdi jańa jetistikterge jetý jolynda únemi qoldaityn bolady», — dedi Beibit Shahanov.
Óz kezeginde sportshylar niet pen kórsetilgen qoldaýǵa alǵystaryn bildirdi.
Eske salaiyq, 2024 jyldyń 11 tamyzynda Parijde XXXIII jazǵy Olimpiada oiyndary aiaqtaldy. Almatylyq sportshylar birqatar medaldardy jeńip aldy jáne halyqaralyq arenada elimizdiń sporttyq bedelin nyǵaitty ári Qazaqstandy abyroimen álemge pash etti.
20 tamyzda Almaty qalasynyń ákimdiginde Olimpiada júldegerlerimen saltanatty kezdesý ótti. Is-shara aiasynda sportshylarǵa aqshalai sertifikattar, avtokólik kiltteri, sondai-aq turǵyn úi alýǵa sertifikattar tabys etildi. Kezdesý kezinde Almaty ákimdiginen aqshalai syilyqtar men avtomobilder tabystaldy.
Turǵyn úi berýge keletin bolsaq, júldegerlerge berilgen sertifikat titýldy sportshylardy páterlermen qamtamasyz etý tetiginiń birinshi kezeńi bolyp tabylady. Sertifikattar tapsyrylǵannan keiin turǵyn úi satyp alý rásimi iske qosyldy. Bul protsess jeke biýdjetti qalyptastyrýdy jáne konkýrs jariialaýdan bastap sharttar jasasýǵa deiingi barlyq qajetti memlekettik satyp alý rásimderin ótkizýdi qamtidy. Bul protsedýralar zańnamamen qatań retteledi jáne belgili bir ýaqytty qajet etedi.
2025 jyldyń 9 qańtarynda barlyq zańdy jáne satyp alý protsedýralary aiaqtaldy. Sportshylardyń jaily ómir súrý jaǵdailaryn qamtamasyz etý úshin páterlerde árleý jumystary júrgizildi. Sport basqarmasynyń qyzmetkerleri osy ýaqyt ishinde ár júldegermen bailanysta boldy jáne kiltterdi tapsyrý kúni árqaisysymen kelisildi.
