23 qyrkúiekte Almatyda bolǵan qatty jańbyrdan keiin Amanjol kóshesiniń bir bóligi qaita búlindi, dep habarlaidy Dalanews.kz.
Jergilikti turǵyndardyń aitýynsha, jaýynnan keiin bul kóshe tutas aryqqa ainalady. Bir apta buryn dál osy jerde birden 13 kólik shuńqyrǵa túsip ketken edi.
Kýágerdiń sózinshe, sý joǵary kóshelerden tómenge aǵyp, asfaltty shaiyp ketedi. Onyń aitýynsha, kólikter sýǵa batyp qalǵannan keiin kommýnaldyq qyzmetter joldy tek topyraqpen kómip qoiǵan, sonyń kesirinen kósheni qaitadan sý shaiǵan.
"Apattan keiin alty kún ótti, taǵy da bárin topyraqpen kómip tastady, biraq jańbyr báribir shaiyp ketti. Aryqtardy qosý úshin jer qazdy, biraq jumysty aiaqtamai, qubyrlardy jol jiegine tastap ketken. Endi búkil kóshe tutas aryqqa ainaldy", – dedi ol.
Turǵyn túsirgen videoda adamdardyń tastan tasqa sekirip, kósheden ótip jatqany kórinedi. Onyń aitýynsha, bul másele osy jerde 20 jyldan beri sheshilmei keledi.
"Búkil aýdannan jinalǵan jaýyn sýy bir jerden shyǵady: qubyrdan sý sarqyrap, jyl saiyn osy kósheniń asfaltyn shaiyp ketedi. Uzyndyǵy 200 metr aryq japyraq pen qoqystan tez bitelip qalady, sý syrtqa shyǵyp, joldy qaita búldiredi. Ár nóserden keiin ony kómip, jóndeidi, biraq alǵashqy jaýyn bárin taǵy shaiyp ketedi. Men bul jerde 20 jyldan beri turamyn, másele sol kúii sheshilmegen", – deidi ol.
Turǵyn jergilikti bilik ókilderin kósheden kórmegenin aitty.
"Búgin aýdan ákiminiń orynbasary osynda kúrekpen júrgenin aitty, biraq oǵan kúrektiń ne keregi baryn túsinbeimin. Ol dron ustap júrýi kerek qoi, sonda ǵana livnevkany qalai qaita bólý keregin kóre alady", – dedi ol.
19 qyrkúiekte Almaty ákimi Darhan Satybaldy merdigerlerdi qadaǵalaýdaǵy olqylyqtar úshin Áýezov aýdany ákimine qatań sógis jariialady. Amanjol kóshesindegi asfalttyń opyrylyp, 13 kóliktiń zaqymdanýyna («Spetsstroi Grýpp LTD»), sondai-aq Iassaýi kóshesindegi jaǵdaiǵa («Spetskommýnstroi») bailanysty shara qoldanyldy.
Sonymen qatar, Medeý aýdanynyń ákimi sógis alyp, Bostandyq aýdany ákiminiń orynbasary qyzmetinen bosatyldy.
