Almatyda óltirilgen kúzetshiniń otbasyna kúdiktiniń jaqyndary aqsha usynǵan, - dep habarlaidy Dalanews.kz "KTK" telearnasyna silteme jasap.
Telearna málimetinshe, Almatyda asqan qatygezdikpen óltirilgen kúzetshiniń otbasyna kúdiktiniń jaqyndary aqsha bermek bolǵan. "Bolǵan jaitqa ókinetinin aityp, keshirim surap keldi", - deidi marqumnyń týystary. Biraq olar keshirim bermeitinin aityp, kináli taraptan birde-bir tiyn almaimyz dep otyr.
Nurbol Qaiypbaevty úsh balasy men týǵan-týysy aqtyq saparǵa shyǵaryp saldy. Qasiretten júregi qansyraǵan ana men jesiri marqumdy joqtaýǵa shamasy kelmei, ózin áreń ustap otyr. Qapydaǵy ólim Nurboldyń aǵa-baýyrlaryn da biraz eseńgiretken. Olar janaza kezinde kúdiktiniń týystary aqsha usynǵanyn aitty.
"Aldymyzdan ótti, "keshirińizder" dep, biraq keshirim bolmaidy dedik, sot bolady. Ádil sot bolǵanyn qalaimyz dedik. Jeńgeme "maǵan nómirin ber, aqsha salyp jibereiin" deidi. Ondai kómek kerek emes dedim, eshqandai kómek kerek emes. Eldiń bári, búkil Qazaqstan bolyp jinap jatyr. "Keshirim bolmaidy" dedim, boldy", - dedi marqumnyń inisi Rýslan Qaiypbaev.
Telearna málimetinshe, aiybyn jýyp-shaimaq bolyp aqsha usynǵandardyń kúdiktige qandai jaqyndyǵy bary belgisiz. Óitkeni onyń ákesi aqsha usynbaq túgili, kúzetshini óltirgendi tanymaimyn dep basyn ala qashqan.
Bul jait qapyda otaǵasynan aiyrylǵan áiel men úsh balasyna aýyr soqqy bolǵan. Úlkeni 14 jasqa tolsa, kenjesiń jasy beste. Barlyǵy jaldamaly páterde turady. Jesir qalǵan jarynyń shotyna qazaqstandyqtar jappai aqsha aýdaryp jatyr.
"Tergeýdiń jan-jaqty ári ádil bolýy úshin dálel-dáiekterdi jinap júrmiz. Osy turǵyda jábirlenýshilerge barynsha kómek kórsetip jatqan qazaqstandyqtarǵa alǵys aitamyz. Qarjylai kómek bergisi keletin jandarǵa aitarymyz, marqumnyń baýyry Rýslan men men jubaiy Ásemge aýdarsańyzdar, sebebi jábirlenýshilerdiń atyn jamylǵan alaiaqtar kóbeiip ketti. Abai bolyńyzdar", - dedi qorǵaýshy Asylbek Ábdiraiymov.
Aita keteiik, ótken jumada "Samal" yqshamaýdanynda jantúrshigerlik oqiǵa boldy. Qandy qylmysqa ekeýiniń arasyndaǵy kikiljiń sebep bolǵan. Kúdikti kólikti masań kúide aidap qalaǵa shyǵýǵa tyrysqan. Kúzetshi oǵan bul áreketiniń zańǵy qaishy ekenin túsindirmek bolypty. Sóitip jol talǵamaityn kólik mingen kúdikti kúzetshini úsh ret taptap, shalajansar jatqanda da basynan tepkilegen.
Qazir bul oqiǵaǵa qatysty asa qatygezdikpen adam óltirý baby boiynsha is tergelip jatyr. Kúdikti eki ai merzimge qamaýǵa alynǵan.
