الماتىدا ولتىرىلگەن كۇزەتشىنىڭ وتباسىنا كۇدىكتىنىڭ جاقىندارى اقشا ۇسىنعان، - دەپ حابارلايدى Dalanews.kz "كتك" تەلەارناسىنا سىلتەمە جاساپ.
تەلەارنا مالىمەتىنشە، الماتىدا اسقان قاتىگەزدىكپەن ولتىرىلگەن كۇزەتشىنىڭ وتباسىنا كۇدىكتىنىڭ جاقىندارى اقشا بەرمەك بولعان. "بولعان جايتقا وكىنەتىنىن ايتىپ، كەشىرىم سۇراپ كەلدى"، - دەيدى مارقۇمنىڭ تۋىستارى. ءبىراق ولار كەشىرىم بەرمەيتىنىن ايتىپ، كىنالى تاراپتان بىردە-بىر تيىن المايمىز دەپ وتىر.
نۇربول قايىپبايەۆتى ءۇش بالاسى مەن تۋعان-تۋىسى اقتىق ساپارعا شىعارىپ سالدى. قاسىرەتتەن جۇرەگى قانسىراعان انا مەن جەسىرى مارقۇمدى جوقتاۋعا شاماسى كەلمەي، ءوزىن ارەڭ ۇستاپ وتىر. قاپىداعى ءولىم نۇربولدىڭ اعا-باۋىرلارىن دا ءبىراز ەسەڭگىرەتكەن. ولار جانازا كەزىندە كۇدىكتىنىڭ تۋىستارى اقشا ۇسىنعانىن ايتتى.
"الدىمىزدان ءوتتى، "كەشىرىڭىزدەر" دەپ، ءبىراق كەشىرىم بولمايدى دەدىك، سوت بولادى. ءادىل سوت بولعانىن قالايمىز دەدىك. جەڭگەمە "ماعان ءنومىرىن بەر، اقشا سالىپ جىبەرەيىن" دەيدى. ونداي كومەك كەرەك ەمەس دەدىم، ەشقانداي كومەك كەرەك ەمەس. ەلدىڭ ءبارى، بۇكىل قازاقستان بولىپ جيناپ جاتىر. "كەشىرىم بولمايدى" دەدىم، بولدى"، - دەدى مارقۇمنىڭ ءىنىسى رۋسلان قايىپبايەۆ.
تەلەارنا مالىمەتىنشە، ايىبىن جۋىپ-شايماق بولىپ اقشا ۇسىنعانداردىڭ كۇدىكتىگە قانداي جاقىندىعى بارى بەلگىسىز. ويتكەنى ونىڭ اكەسى اقشا ۇسىنباق تۇگىلى، كۇزەتشىنى ولتىرگەندى تانىمايمىن دەپ باسىن الا قاشقان.
بۇل جايت قاپىدا وتاعاسىنان ايىرىلعان ايەل مەن ءۇش بالاسىنا اۋىر سوققى بولعان. ۇلكەنى 14 جاسقا تولسا، كەنجەسىڭ جاسى بەستە. بارلىعى جالدامالى پاتەردە تۇرادى. جەسىر قالعان جارىنىڭ شوتىنا قازاقستاندىقتار جاپپاي اقشا اۋدارىپ جاتىر.
"تەرگەۋدىڭ جان-جاقتى ءارى ءادىل بولۋى ءۇشىن دالەل-دايەكتەردى جيناپ ءجۇرمىز. وسى تۇرعىدا جابىرلەنۋشىلەرگە بارىنشا كومەك كورسەتىپ جاتقان قازاقستاندىقتارعا العىس ايتامىز. قارجىلاي كومەك بەرگىسى كەلەتىن جاندارعا ايتارىمىز، مارقۇمنىڭ باۋىرى رۋسلان مەن مەن جۇبايى اسەمگە اۋدارساڭىزدار، سەبەبى جابىرلەنۋشىلەردىڭ اتىن جامىلعان الاياقتار كوبەيىپ كەتتى. اباي بولىڭىزدار"، - دەدى قورعاۋشى اسىلبەك ءابدىرايىموۆ.
ايتا كەتەيىك، وتكەن جۇمادا "سامال" ىقشاماۋدانىندا جانتۇرشىگەرلىك وقيعا بولدى. قاندى قىلمىسقا ەكەۋىنىڭ اراسىنداعى كيكىلجىڭ سەبەپ بولعان. كۇدىكتى كولىكتى ماساڭ كۇيدە ايداپ قالاعا شىعۋعا تىرىسقان. كۇزەتشى وعان بۇل ارەكەتىنىڭ زاڭعى قايشى ەكەنىن تۇسىندىرمەك بولىپتى. ءسويتىپ جول تالعامايتىن كولىك مىنگەن كۇدىكتى كۇزەتشىنى ءۇش رەت تاپتاپ، شالاجانسار جاتقاندا دا باسىنان تەپكىلەگەن.
ءقازىر بۇل وقيعاعا قاتىستى اسا قاتىگەزدىكپەن ادام ءولتىرۋ بابى بويىنشا ءىس تەرگەلىپ جاتىر. كۇدىكتى ەكى اي مەرزىمگە قاماۋعا الىنعان.
