Almaty qalasynyń ákimi Darhan Satybaldynyń tóraǵalyǵymen ótken keńeste qalanyń jaryqtandyrý júiesiniń sheber josparynyń jobasy tanystyryldy. Qujat qalanyń barlyq aýmaǵyn jáne negizgi kólik baǵyttaryn qamtyp, zamanaýi qaýipsizdik, energiia únemdilik jáne vizýaldy qabyldaý talaptaryna sai keletin syrtqy jáne sáýlettik jaryqtandyrýdyń biryńǵai júiesin qalyptastyrýǵa baǵyttalǵan,- dep habarlaidy Dalanews.kz
Talqylaý barysynda ákim jaryqtandyrý strategiiasy qaǵaz júzinde qalmai, naqty nátije beretin júie bolýy kerektigin basa aitty.
«Qazir biz ártúrli elden bilikti mamandardy tartyp jatyrmyz. Ózim de bul isti jiti baqylaýǵa alamyn, keshki ýaqytta nysandardy aralap, jaryqtyń shyn máninde halyq úshin qalai qyzmet etip jatqanyn kórip, baǵalaimyn», - dedi Darhan Satybaldy.
Ákimniń aitýynsha, jaryqtandyrýdyń sheber jospary sáýlet, qaýipsizdik pen zamanaýi tehnologiia toǵysqan júieli sheshim. Bul rette, halyqaralyq standarttarǵa sai bolý jáne Almatynyń tarihi kelbetin saqtaý negizgi basymdyqtardyń biri.
Sheber jospar «Atlas Global KZ» kompaniiasynyń qatysýymen ázirlenip jatyr. Joba barysynda Máskeý, London, Lion, Seýl, Izmir sekildi álemniń iri qalalaryndaǵy tájiribe saralanyp, Almatynyń erekshelikterine sai beiimdelip usynylyp otyr.
Qujatta kóshe men qoǵamdyq keńistikterdi jaryqtandyrýdy júieli taratý, sáýlettik jáne oqiǵalyq jaryqtandyrýdy damytý, jaryqtyq lastanýdy azaitý, syrtqy jaryqtandyrýdy «aqyldy qala» júiesine biriktirý, sondai-aq túngi ýaqytta, ásirese áielder, balalar men múmkindigi shekteýli jandardyń qaýipsizdigin qamtamasyz etýge basa nazar aýdarý kózdelgen.
Josparǵa sai, 2025 jyldyń sońyna deiin Almatynyń barlyq kóshesi tolyq jaryqtandyrylady. Bul túngi qaýipsizdikti arttyryp qana qoimai, qala ómiriniń keshki tynysyn jandandyrýǵa – týrizmdi damytýǵa, dámhanalar men dúkenderdiń, shaǵyn biznestiń órkendeýine jol ashady.
Keńes sońynda qala ákimi Energetika jáne sýmen jabdyqtaý basqarmasyna jáne «Almaty Qala Jaryq» mekemesine sheber jospardyń oryndalýyn turaqty baqylaýda ustaýdy jáne qoldanystaǵy normativtik qujattarǵa qajetti tolyqtyrýlar men ózgerister engizýdi tapsyrdy.
