Almatyda KVI taralýynyń aldyn alý jónindegi jedel shtab otyrysynyń barysynda habarlanǵandaı, ótken aptada KVI tirkeýi 10,5 myńnan 10,9 myń jaǵdaıǵa deıin ósti. Sonymen qatar, sımptomdy aýrýlardyń úlesiniń artýy baıqaldy, ol sońǵy aptada 94,2%-dy qurady, – dep habarlaıdy Dalanews.kz.

Búginde kovıdtik stasıonarlarda 6 602 adam jatyr, onyń 182-si balalar. 300-ge jýyq naýqastyń jaǵdaıy óte aýyr, taǵy 464-i reanımasıada, 2511-iniń hali nashar.

Sońǵy eki aptadaǵy jas quramyna taldaý kórsetkendeı, burynǵydaı 20-39 jas aralyǵyndaǵy halyqtyń belsendi toptary arasynda derttiń joǵary ekeni tirkelgen – 33,5%, 40-59 jas arasynda – 25,2%, 60 jastan asqandar arasynda – 23, 1%. Qalǵan 18% – balalar men jasóspirimder.

Koronavırýstyń taralýyna áser etetin faktorlar – týystarmen, dostarmen jáne jumystaǵy baılanystar. Búginde Almatyda KVI ınfeksıasyn juqtyratyn bes oryn anyqtalǵan, olar mynalar: saýda obektileri – 32%, otbasylyq baılanys – 16%, qoǵamdyq kólikter – 17,1%, bazarlar – 13%.

Buqaralyq is-sharalardy ótkizýge tyıym salynǵanyna qaramastan, quqyq buzýshylyq azaımaı otyr. Keıbir Almaty turǵyndary barlyq talaptardy elemeı, túrli merekeler uıymdastyryp, buqaralyq sharalar ótkizedi. Osylaısha, qala turǵyndary ózderiniń densaýlyǵyna ǵana emes, jaqyndarynyń densaýlyǵyna da qaýip tóndirýde.

Ambýlatorlyq emdeletin naýqastardyń ózin-ózi oqshaýlaýyna erekshe nazar aýdarý qajet. Dert juqtyrǵan 143 030 naýqas mobıldi brıgada men telemedısına ortalyǵynyń baqylaýynda. Onyń 13 769-y jeńil jáne ortasha aýyrlyqta, 534-i sımptomsyz. Bul rette 8735 naýqas eresek turǵyndar, 60 jastan asqandar – 2952 adam, balalar – 2616.

Ashyq jobasy boıynsha adamdar kóp shoǵyrlanatyn oryndardaǵy naýqastardy anyqtaý jalǵasýda. 6-11 tamyz aralyǵynda Ashyq jobasy arqyly jumys isteıtin kásipkerlik obektilerdiń kireberisinde skanerleý nátıjesinde 1335 turǵynnyń qyzyl, 100-i sary mártebeleri rastaldy.

Atap aıtqanda, saýda jáne oıyn-saýyq ortalyqtaryna barǵan kezde qyzyl mártebeli – 269, sary mártebeli 31 turǵyn anyqtaldy. Bazarlarda qyzyl – 146, 12 sary mártebeli adamdar rastaldy. Qoǵamdyq tamaqtaný oryndaryna qyzyl mártebeli – 293, sary mártebeli 22 adam kelgen.

6-20 tamyz aralyǵynda qyzyl mártebeli 156 adamǵa ózin-ózi oqshaýlaý rejımin buzǵany úshin 30 AEK mólsherinde aıyppul salyndy.

Almaty qalasynda 27 sáýir men 20 tamyz aralyǵynda qyzyl mártebeli 543 jeke tulǵaǵa ózin oqshaýlaý rejımin buzǵany úshin 30 AEK mólsherinde aıyppul salyndy.