Almaty qalasynda Medeu city TÚK ornalasqan 20 úide halyqtyń áleýmettik osal tobyna jatatyn taǵy da 86 kezekte turǵan jandarǵa páter kilti tabystaldy, dep habarlaidy Dalanews.kz.
Baspanany kópten kútken turǵyndardy qýantqan saltanatty is-sharalar legi jalǵasyp otyr.
Esterińizge sala keteiik, biyl 25 mamyrda alǵashqy 124 kezekte turǵandarǵa jańa páterlerdiń kilti tabystaldy, al 28 mamyrda bul tizimge taǵy 164 adam qosyldy, 30 mamyrda kezekte turǵan 105 jan baspanaly bolsa, endi kezekte turǵan tórtinshi lekten 111 adamǵa 5 maýsymda baspana buiyrdy.
«Almaty qalasynyń ákimi Erbolat Dosaevtyń tapsyrmasymen 2024 jyly halyqtyń áleýmettik osal tobynyń tizimi boiynsha kezekte turǵan azamattarǵa kezektilik tártibimen qalanyń kommýnaldyq turǵyn úi qorynan eki myń jalǵa beriletin páter berý josparlanǵan, onyń 400-i jetim balalarǵa beriledi. Sondai-aq, páterlerdi basqa adamdarǵa jalǵa berýge jáne qaita josparlaýǵa bolmaidy. Jańa páterlerdiń kiltin berý boiynsha is-sharalar jalǵasady jáne jaqyn arada taǵy júzdegen kezekte turǵan jan jańa turǵyn úige qonystanady», - dedi Almaty qalasy Kommýnaldyq infraqurylymdy damytý basqarmasy basshysynyń orynbasary Ǵalymjan Ábdishúkiruly.
Jańa páter ieleri bul kópten kútken úlken qýanysh ekenin atady.
Úsh uldyń anasy Aiman Nurtaeva emotsiiasyn jasyrmady.
«Men óte rizamyn, qýanyshtymyn. Bul sátti uzaq kúttik, 2011 jyly kezekke turdyq. Biz úshin bul úlken qoldaý», - dedi Almaty qalasynyń turǵyny Aiman Nurtaeva.
