Almatyda qoǵamdyq kólikti yńǵaily ári qoljetimdi etý maqsatynda uzyndyǵy 4,6 shaqyrym bolatyn BRT (Bus Rapid Transit) jelisiniń qurylysy Jeltoqsan kóshesinde bastalady. Bul jańa joǵary jyldamdyqtaǵy avtobýs jolaǵy Timiriazev kóshesi boiyndaǵy jumys istep turǵan BRT jelisin Raiymbek batyr dańǵylynda salynyp jatqan jańa jelimen bailanystyrady,– dep habarlaidy Dalanews.kz
Kólik keptelisi men avtoturaqqa bailanysty týyndaǵan jaitty sheshý úshin BRT jolaǵy joldyń shetimen salynady. Iaǵni, soltústik baǵytta – joldyń oń jaǵymen, al ońtústik baǵytta – sol jaǵymen ótedi. Jeke avtokólik qozǵalysy úshin Abai dańǵylynan soltústikke qarai birjaqty qozǵalys pen jolaqtar sany saqtalady.
Qurylys qalai ótedi?
Qurylysta eshqandai ǵimaratty buzý jáne joldy keńeitý qarastyrylmaǵan. Avtobýs aialdamalary múmkindigi shekteýli jandar úshin qoljetimdilikti eskere otyryp, arnaiy platformada ornalastyrylady. Joba aiasynda baǵdarsham nysandaryn jańartý, kóshe jaryǵyn jetildirý, trotýarlardy plitkamen qaptaý arqyly jaiaý júrginshiler bóligin jańartý kózdelgen.
Jumys 26 sáýirde bastalady. Alǵashqy kezeńde injenerlik kommýnikatsiia, jiektastar men aryq júieleri qaita ornalastyrylady. Bul jumystar joldyń shetinde, kólik qozǵalysyn shektemei júrgiziledi.
Maýsymda jańa asfalt tóselip, jol tańbalary syzylady. Jol jamylǵysy tolyqtai jańartylyp, qozǵalys 36 saǵatqa deiin ishinara shekteledi. Ainalma joldar men ýaqyty aldyn ala habarlanady.
Jobany aiaqtaý biylǵy jyldyń sońyna josparlanǵan.
Jobanyń maqsaty — Timiriazev kóshesindegi qoldanystaǵy BRT jelisin Raiymbek batyr dańǵylyndaǵy salynyp jatqan jelimen biriktirý. Sonyń nátijesinde BRT jelisi shyǵys-batys qana emes, ońtústik-soltústik baǵytyndaǵy kólik bailanysyn da arttyrady. Jeltoqsan kóshesindegi avtobýstardyń ortasha jyldamdyǵy 40%-ǵa, al jolaýshylar legi 30%-ǵa artpaq.
Eske salaiyq, qolǵa alynǵan jumystar, kólik qozǵalysyndaǵy ózgerister týraly aqparat turaqty túrde Almaty_Joly Telegram arnasy, qala ákimdiginiń áleýmettik jelileri, sondai-aq, 2GIS pen Iandeks kartalary servisteri arqyly jariialanyp otyrady.
