Almatyda Ulttyq áskeri-patriottyq ortalyqtyń Jaýyngerlik dańq mýzeiiniń jańa «Ashyq aspan astyndaǵy mýzei» bóliminiń saltanatty ashylý rásimi ótti,- dep habarlaidy Dalanews.kz
Is-shara Armiia úiiniń (burynǵy Ofitserler úii) aýmaǵynda Qazaqstan Respýblikasy Qorǵanys ministriniń orynbasary, general-maior Shaih-Hasan Jazyqbaev, Almaty qalasy ákiminiń orynbasary Azamat Qaldybekov, Qarýly kúshterdiń ókilderi men qurmetti qonaqtardyń qatysýymen uiymdastyryldy.
Saltanat Memlekettik Ánuranmen ashylyp, Qorǵanys ministrligi men qala ákimdigi atynan quttyqtaý sózder aityldy. Jańa ekspozitsiiany jasaýǵa atsalysqan áskeri qyzmetkerler marapattaldy. Rásimniń basty sáti – lentany qiyp, alǵashqy ekskýrsiianyń bastalýy boldy.
Jańa ekspozitsiialyq bólim Sh.Qaldaiaqov kóshesi jaǵyndaǵy ashyq alańda ornalasqan. Munda 30-dan astam túpnusqa jáne qalpyna keltirilgen áskeri tehnika úlgileri qoiylǵan. Barlyq eksponat qalpyna keltirilip, tehnikalyq sipattamalar men tarihi málimetter jazylǵan taqtalarmen jabdyqtalǵan.
Ekspozitsiiada Jeńistiń simvolyna ainalǵan T-34 tanki, aty ańyzǵa ainalǵan BM-13 «Katiýsha» zymyran tasyǵyshy, sondai-aq T-44 jáne T-55 siiaqty keńestik tankiler bar. Sonymen qatar, BTR-40, BRDM-1 jáne BRDM-2 bronetransporterleri, BMP-1 jaiaý áskerdiń jaýyngerlik mashinasy, ártúrli gaýbitsalar, minometter, zenittik jáne dalalyq artilleriia quraldary qoiylǵan.
Kórmedegi erekshe qyzyǵýshylyq týdyratyndar – sheteldik sirek úlgiler: 120 mm «Finýlianý» minometi (Shvetsiia), 158 mm «Kebelverh-41» minometi (Germaniia) jáne 105 mm M-2A1 HOWITZER gaýbitsasy (AQSh). Sondai-aq, 203 mm BL-39 gaýbitsasy, 122 mm M-30 gaýbitsasy, 100 mm BS-3 dalalyq zeńbiregi, ZPÝ-2 jáne S-60 zenittik qurylǵylary, PM-120 jáne M-240 minometteri syndy artilleriialyq tehnika da kórmege qoiylǵan.
Jaýyngerlik dańq mýzeii 1965 jyly qurylǵan jáne ol Almatydaǵy áskeri-patriottyq tárbie berýdiń mańyzdy ortalyǵy sanalady. Mýzei toptamasy XIX ǵasyrdan qazirgi kúnge deiingi Qazaqstannyń áskeri tarihyn qamtidy. Negizgi qor maidangerlerdiń túpnusqa qujattary, fotosýretteri, hattary, marapattary men jeke zattarynan turady. Materialdardyń eleýli bóligin general Panfilovtyń qyzy – Panfilov diviziiasynyń ardageri Valentina Panfilova tapsyrǵan.
Mýzei Almaty qalasy, Medeý aýdany, Zenkov kóshesi, 24 mekenjaiynda ornalasqan. Jalpy aýdany 1260 sharshy metrden asady. Munda 15 maman jumys isteidi, jyl saiyn 25 myńnan astam adam mýzeidi tamashalaidy.
