Almatyda bilimmen de, eńbekpen de ainalyspaityn jastardyń úlesi (NEET sanaty) birtindep tómendep keledi. 2025 jyldyń ekinshi toqsanynyń qorytyndysy boiynsha bul kórsetkish 6,4 paiyzdan 5,8 paiyzǵa deiin azaiyp, 39,3 myń adamǵa jetti. Jastar arasyndaǵy jumyssyzdyq deńgeii 4,1 paiyzdy kórsetip otyr. Bul týraly qalanyń jastar saiasaty basqarmasy málimdedi, dep habarlaidy Dalanews.kz.
Qazir megapoliste 14 pen 35 jas aralyǵyndaǵy 712 myńnan astam jas turady. Bul qala halqynyń shamamen úshten biri. Jastardy qoldaý maqsatynda shaharda bilim berý, jumyspen qamtý jáne tulǵalyq damý baǵytynda júieli jumys qolǵa alynǵan.
Jastar saiasatynyń basty basymdyqtarynyń biri sapaly bilim berip, keiin eńbek naryǵynda óz ornyn tabýǵa múmkindik jasaý. Almatyda 35 joǵary oqý orny bar, onda 210 myńnan astam stýdent bilim alyp júr. Qalalyq mansap ortalyǵy 5 myńnan astam jasqa baǵyt-baǵdar berip, jumysqa ornalasýyna járdemdesken. 2025 jyldyń basynan beri Eńbek mobildigi ortalyǵy arqyly 8,4 myń jas jumyspen qamtylǵan, onyń 4,9 myńy turaqty, 3,5 myńy sýbsidiialanǵan jumys oryndaryna ornalasqan.
Sonymen qatar Almatyda jastardy qoldaýǵa baǵyttalǵan birqatar iri joba júzege asyrylyp jatyr. Atap aitqanda, Skill All jobasy aiasynda oflain formatta qoldanbaly daǵdylarǵa úiretý kýrstary ótkiziledi; Jasalmaty.kz portaly arqyly onlain-oqytý jáne jumys izdeý qyzmetteri qoljetimdi; New Generation Leaders kareralyq olimpiadasy men jetekshi jumys berýshiler qatysatyn karera kúnderi uiymdastyrylady. Sondai-aq, jastarǵa maýsymdyq jumys usynatyn ulttyq «Jasyl el» jobasy da jalǵasyp keledi.
Almaty qalasy Jastar saiasaty basqarmasynyń málimetinshe, osy baǵdarlamalardyń nátijesinde 10 myńnan astam jas túrli oqytý kýrsynan ótip, 18 myńnan astamy jumysqa ornalasty.
