Almatyda 17–23 qarasha aralyǵynda jasóspirimder (U-15, U-17) arasyndaǵy toǵyzqumalaqtan Álem chempionaty ótip jatyr. Shara Almatydaǵy «Zenit» sport ortalyǵynda ekinshi ret uiymdastyrylyp, ashylý saltanatyna Almaty qalasy ákimdigi, Máslihat, sport basqarmasy, qoǵamdyq keńes, QR Toǵyzqumalaq sporty federatsiiasy, Dúniejúzilik federatsiia jáne sheteldik delegatsiialar qatysty, dep habarlaidy Dalanews.kz.
«Dúniejúzinen ondaǵan memleket qatysyp otyrǵan oqýshylar arasyndaǵy álem chempionaty taǵy da jalaýyn kóterip otyr. Biz bul sharaǵa atsalysqan barlyq toǵyzqumalaq janashyrlaryna alǵys bildiremiz. Dúniejúzilik toǵyzqumalaq federatsiiasynyń prezidenti Álihan Baimenovtiń sálemin jetkizemin. Ol kisi únemi aitady: toǵyzqumalaqta jeńiletinder, utylatyndar bolmaidy. Utatyn - tek ulttyq múdde. Bul oiynǵa álemdik qyzyǵýshylyq artty», – dep atap ótti Qazaqstan Toǵyzqumalaq sporty federatsiiasynyń prezidenti Ákim Tursyn.
Chempionat klassika (onlain jáne oflain), rapid jáne blits formatynda ótedi. Biyl jarysqa 21 memleketten 180 jas sportshy qatysyp, ziiatkerlik sheberlikterin synaidy. Qatysýshylar ulttyq oiyndy halyqaralyq deńgeide nasihattap, óz elderiniń namysyn qorǵaidy.
Sharanyń basty maqsaty – toǵyzqumalaqty álemdik arenada keńinen tanytý, jas býynnyń intellektýaldyq qabiletin damytý jáne halyqaralyq mádeni bailanystardy nyǵaitý. Jarysty Almaty qalasy ákimdigi qoldap, QR Mádeniet jáne sport ministrligi men Halyqaralyq federatsiia uiymdastyrady. Demeýshiler – KMF Bank jáne JET.
Jarys jeńimpazdary men júldegerleri kýboktar, medaldar men diplomdarmen marapattalady. Álem chempionatynyń jabylý saltanaty 22 qarasha saǵat 14:00-de ótedi.
