Almatyda «Jasyl el» jastar eńbek jasaqtarynyń jańa eńbek maýsymynyń saltanatty ashylýy ótti. Is-shara Almaty qalasy Jastar saiasaty basqarmasynyń qoldaýymen jáne Almaty qalasy «Jasyl el» qalalyq shtabynyń uiymdastyrýymen ótti,- dep habarlaidy Dalanews.kz
Jobanyń negizgi maqsaty – Almaty qalasynyń jastaryn kógaldandyrý jáne abattandyrý jumystaryna tartý arqyly ýaqytsha eńbekpen qamtý, ekologiialyq sanany qalyptastyrý jáne patriottyq rýhty damytý.
2025 jylǵy eńbek maýsymy aiasynda 2100 jas ýaqytsha jumyspen qamtylady dep josparlanýda. Qazirgi tańda olardyń ishinde 1266 jas jumysqa kirisip úlgerdi. Jastar qaladaǵy saiabaqtarda, skverlerde, ózen jaǵalaýlarynda jáne basqa da qoǵamdyq keńistikterde kógaldandyrý, tazalaý jáne abattandyrý jumystarymen ainalysýda.
Saltanatty ashylý rásimine memlekettik jáne qoǵam qairatkerleri, jastar uiymdarynyń kóshbasshylary men belsendi jastar qatysty. Qurmetti qonaqtar qatarynda Almaty qalasy Jastar saiasaty basqarmasynyń basshysy Kajdenbek Aziz, tanymal ekolog Skakova Aijan, «Jasyl el» respýblikalyq shtabynyń tóraǵasy Nurasyl Jasulanuly, qoǵamdyq keńes músheleri, úkimettik emes uiymdardyń ókilderi jáne jastar qozǵalystarynyń músheleri boldy.
Sonymen qatar, joba aiasynda Almaty qalasynyń 5 jetekshi joǵary oqý orny men ekologiialyq baǵyttaǵy seriktes uiymdar tartylyp, jastardy jumyspen qamtý boiynsha birlesken jumys belsendi túrde júrgizilýde. Bul seriktestik jastardyń ekologiialyq mádenietin arttyrýǵa jáne olardyń tájiribelik daǵdylaryn damytýǵa baǵyttalǵan.
Is-shara aiasynda merekelik kontserttik baǵdarlama uiymdastyryldy. Qatysýshylarǵa erekshe kóńil kúi syilaǵan otandyq tanymal oryndaýshylar Dýman Marat pen ADIL óz ónerlerin kórsetti.
Jobanyń qatysýshysy, «Jasyl el» qatarynda úshinshi jyl jumys istep júrgen stýdent Oljabai Merei óz áserimen bólisti.
«Jasyl el – bul jai ǵana kógaldandyrý jumysy emes, bul – jaýapkershilik, dostyq pen damý mektebi. Ár maýsym men úshin týǵan qalama úles qosýǵa, jańa adamdarmen tanysyp, óz eńbegimniń mańyzdylyǵyn sezinýge úlken múmkindik», – dedi ol.
2004 jyldan bastap júzege asyrylyp kele jatqan «Jasyl el» baǵdarlamasy búginde Qazaqstandaǵy eń iri ekologiialyq-eńbek jastar jobalarynyń birine ainaldy. Almaty qalasynda bul baǵdarlama jyl saiyn myńdaǵan jasty biriktirip, olardyń eńbekke, patriotizmge jáne ekologiialyq mádenietke degen kózqarasyn qalyptastyrýda mańyzdy ról atqaryp keledi.
