Almatyda 250 oryndyq jańa zamanaýi stýdenttik jataqhana ashyldy. Nysan jeke investitsiialar esebinen salynǵan. Bul megapolistegi stýdenttik infraqurylymdy damytýǵa arnalǵan aýqymdy baǵdarlamanyń bir bóligi ári Almatynyń óńirdegi jetekshi bilim ortalyǵy retindegi mártebesin kezeń-kezeńimen nyǵaityp kele jatqanyn aiqyn kórsetedi,- dep habarlaidy Dalanews.kz
Jataqhana tolyqtai qazirgi standarttarǵa sai. Ǵimaratta stýdentterdiń qaýipsizdigin qamtamasyz etetin beinabaqylaý júiesi ornatylǵan. Ár bólmede jeke sanitarlyq torap, turmystyq tehnika jáne ózdiginen as ázirleýge arnalǵan jabdyqtar qarastyrylǵan. Munda tek turýǵa ǵana emes, sonymen qatar oqýǵa jáne demalýǵa da jaǵdai jasalǵan. Osylaisha jańa turǵyn oryndary stýdentter úshin barynsha qolaily ári qaýipsiz orta usynady.
Alǵashqy stýdentterdiń legi qonystana bastady. Bul jataqhanada birden úsh iri joǵary oqý ornynyń jastary turady: Ál-Farabi atyndaǵy Qazaq ulttyq ýniversiteti, «Turan» ýniversiteti jáne Halyqaralyq aqparattyq tehnologiialar ýniversiteti (HATÝ).
– Almatyda jańa stýdenttik jataqhananyń ashylýy – stýdentterge qolaily oqý men turmys jaǵdaiyn qamtamasyz etý jónindegi Prezident tapsyrmasyn oryndaýdaǵy mańyzdy qadam. Biz búgin oryn tapshylyǵy máselesin sheship qana qoimai, jastarymyzdyń bolashaǵyna ári qalanyń damýyna qyzmet etetin zamanaýi infraqurylym qalyptastyryp jatyrmyz, – dedi Almaty qalasy Jastar saiasaty basqarmasynyń basshysy Aziz Kajdenbek.
Mundai jobalardy júzege asyrýda memlekettik qoldaý mańyzdy ról atqarady. Búginde eki tetik jumys isteidi: jańa jataqhana salǵan jaǵdaida alty jyl boiy ár stýdentke 230 AEK kóleminde shyǵyn óteledi, al ǵimaratty qaita jańǵyrtqan jaǵdaida segiz jyl boiy 92 AEK kóleminde tólem qarastyrylǵan.
Jańa oqý jyly bastalǵanǵa deiin Almatyda taǵy úsh zamanaýi jataqhana ashylady. Olardyń jalpy syiymdylyǵy 1100-den astam orynǵa eseptelgen. Jyl sońyna deiin 15 jańa nysan paidalanýǵa berilip, 6 myńnan astam stýdent qosymsha orynmen qamtylady.
Qazirgi tańda qalada 120-dan astam jataqhana jáne shamamen 60 hostel jumys isteidi. Olardyń bir bóligi stýdentterdi ýaqytsha ornalastyrý baǵdarlamasyna tartylǵan. Ár joǵary oqý ornynda stýdentterdiń turmystyq máseleleri men shaǵymdaryn qabyldaityn jedel ortalyqtar bar.
