Almatyda jańa jyldyq bezendirýge shamamen 800 mıllıon teńge jumsalady. Megapolıs áýejaıdan bastap ortalyq alańdarǵa deıin bezendirilmek. Sondaı-aq, merekelik baǵdarlamalar josparlanǵan, dep habarlaıdy Dalanews.kz.
Ákimdiktiń málimetinshe, Almaty aýmaǵynda 300-ge jýyq ertegi keıipkerleri men merekelik belgilerge uqsas shaǵyn sáýlet nysandary ornatylady, onyń ishinde 120-sy ótken jylǵy jóndeýden ótken konstrýksıalar. Bıyl merekelik sharalarda buryn qalpyna keltirilgen ınstallásıalar men mádenı mekemelerdiń qatysýyna basymdyq berilgen. Bul qadam keń aýqymdy merekeni ońtaıly shyǵyndarmen ótkizýge múmkindik beredi.
Qaladaǵy negizgi kósheler men dańǵyldarda jaryq qosylǵan ınstallásıalar ornatylady. Magıstraldar boıyna 1500 jaryq elementi qoıylady, olardyń 350-i ótken jyly qalpyna keltirilgen. Sondaı-aq, 21 mańyzdy ǵımarattyń qasbetteri jaryqtandyrylady, al “Kóktóbe” telemunarasynda mýltımedıalyq beıneshoý kórsetiledi.
Respýblıka Saraıy aldyndaǵy Abaı alańyna bıiktigi 22 metr bolatyn basty shyrsha ornatylady. Ol uzyndyǵy 6 shaqyrym gırlándamen, sándik sharlarmen jáne eko-oıynshyqtarmen bezendiriledi. Qalada jalpy 80-nen astam shyrsha qoıylady. Olar Tuńǵysh Prezıdent saıabaǵynda, Respýblıka alańynda, “Almaty Arenada”, “Halyq Arena” muz saraıynda jáne basqa da oryndarda boı kóteredi.
Basty shyrshany jaǵý rásimi 20 jeltoqsanda ótedi. Sol kúni Abaı alańynda qazaqstandyq juldyzdardyń qatysýymen merekelik konsert uıymdastyrylady. Al Astana alańynda jármeńke men Aıaz atanyń kıiz úıi qoıylady. Almaty Arbaty Karnabı-strıt stılinde bezendirilip, kúndelikti jármeńkeler men mýzykalyq qoıylymdar ótedi.
Almaty sırki “Qar hanshaıymy” sırktik shoýyn, Memlekettik qýyrshaq teatry “Sıqyrly aına” qoıylymyn usynady. Baǵdarlamaǵa balalarǵa arnalǵan ınteraktıvti oıyndar, jańa jyldyq sherýler jáne kórmeler kiredi. Olar qalanyń segiz aýdanynda ótedi.
Jańa jyldyq sharalar 31 jeltoqsanda QBTÝ ǵımaratynyń aldynda qazaqstandyq tanymal oryndaýshylardyń qatysýymen ótetin konsert pen merekelik shoýmen aıaqtalady.
