Almatyda qoǵamdyq kólik júrgizýshilerine qoıylatyn talaptar kúsheıtilip, jumys jaǵdaıy jaqsartylady, dep habarlaıdy Dalanews.kz.

Qala ákimi Erbolat Dosaevtyń málimdeýinshe, júrgizýshiler jolaýshylarmen qarym-qatynas mádenıeti boıynsha arnaıy kýrstan ótedi. Bul shara qoǵamdyq kóliktegi qyzmet kórsetý sapasyn arttyrýǵa baǵyttalǵan.

Júrgizýshiler jetispeýshiligi – basty másele

Ákimniń aıtýynsha, Open Almaty platformasyna túsken ótinishterge qaraǵanda, qoǵamdyq kólik qyzmeti birshama jaqsarǵanymen, bul salada áli de sheshilmegen máseleler bar.

“Júrgizýshi tapshylyǵy áli de ózekti. Bul olardyń artyq jumys isteýine jáne qyzmet kórsetý sapasynyń tómendeýine alyp keledi”, – dedi Dosaev.

Jalaqy ósedi, etıka kýrstary engiziledi

Qoǵamdyq kólik sapasyn arttyrý maqsatynda ákimdik júrgizýshilerdiń jalaqysyn kóterý jáne mindetti etıka kýrstaryn engizý týraly sheshim qabyldady.

“Kýrstan ótken júrgizýshilerge jalaqyǵa qosymsha ústeme aqy qarastyrylady”, – delingen habarlamada.

Bul sharalar jolaýshylarǵa qyzmet kórsetý deńgeıin jaqsartyp, qoǵamdyq kólik júrgizýshileriniń eńbek jaǵdaıyn jaqsartýǵa baǵyttalǵan.