Almatydaǵy emhananyń bas býhgalteri bas bostandyǵynan aiyryldy, - dep habarlaidy Dalanews.kz.
Qarjylyq múddesi úshin birneshe ret bóten múlikti urlaýǵa baǵyttalǵan qasaqana qylmys, aldyn ala kelisim boiynsha, óziniń qyzmettik jaǵdaiyn paidalana otyryp, bir top adamdardy sot aldynda jaýapqa tartýǵa alyp keldi.
Almaty qalasy №30 qalalyq emhanasynyń bas býhgalteri H. pen poliklinikanyń esepshisi T-ǵa qatysty, bóten múlikti asa iri kólemde iemdený nemese ysyrap etý (QR QK 189-baby 4-bóligi 2-tarmaq) týraly qylmystyq is Almaty qalasy Medeý aýdanynyń №2 aýdandyq sotynda qaraldy.
Sot otyrysy barysynda bas býhgalter men esepshiniń, jeke zańsyz tabys tabý múddesinde, 2019 jyldyń maýsymnan 2023 jyldyń qarasha aiyna deiin jumys istemeitin adamdardyń kartochka shottaryna jalaqy men ústemelerdi eseptep aqsha aýdarǵany anyqtaldy.
Quqyqbuzýshylyq shemasy nátijesinde memleketke jalpy somasy – 340 387 113 teńge materialdyq ziian keltirildi.
Sotta sottalýshylar ózderiniń kinásin tolyq moiyndady. Prokýror sottalýshylarǵa 8 jáne 7,6 jyl bas bostandyǵynan aiyrýdy surady. Jaza taǵaiyndaý kezinde sottalýshylardyń jasaǵan qylmysy úshin ókinish bildirýi jáne buryn sottalmaýy siiaqty jeńildetetin jaǵdailar eskerildi.
Sottyń úkimi:
H. kináli dep tanyldy jáne oǵan 7 jyl 6 ai bas bostandyǵynan aiyrý jazasy taǵaiyndaldy, 5 jylǵa materialdyq jaýapkershilikke bailanysty qyzmetpen ainalysý quqyǵynan aiyrý jazasy taǵaiyndaldy.
T. kináli dep tanyldy jáne oǵan 7 jylǵa bas bostandyǵynan aiyrý jazasy taǵaiyndaldy, 5 jylǵa materialdyq jaýapkershilikke bailanysty qyzmetpen ainalysý quqyǵynan aiyryldy. Úkim zańdy kúshine engen joq.
