Almatynyń №2 qalalyq perinataldyq ortalyǵynda dárigerler júktiliktiń 27-aptasynda dúniege kelgen shala týǵan qyz balany aman alyp qaldy. Bul týraly qaladaǵy Qoǵamdyq densaýlyq saqtaý basqarmasynyń ókilderi aitty, dep habarlaidy Dalanews.kz
Bolashaq ana amniotikalyq suiyqtyqtyń merziminen buryn aǵýyna bailanysty ortalyqqa shuǵyl túrde jetkizilgen. Ýltradybystyq zertteý nátijesinde mamandar ishtegi náresteniń ómirine qaýip tónip turǵanyn anyqtap, shuǵyl ota jasaý týraly sheshim qabyldady.
Kesar tiligi ortalyq direktory Svetlana Rahimova bastaǵan dárigerler tobynyń qatysýymen júrgizildi. Sonyń nátijesinde salmaǵy nebári 730 gramm bolatyn qyz bala dúniege keldi.
Náreste ómiriniń alǵashqy sátinen bastap jańa týǵan balalardyń jansaqtaý jáne qarqyndy terapiia bóliminde boldy. 28 kún boiy dárigerler men medbikeler onyń jaǵdaiy úshin táýlik boiy kúresti.
Jaǵdaiy turaqtanǵan soń sábi kútimniń ekinshi kezeńine — jańa týǵan náresteler patologiiasy bólimine aýystyryldy. Otbasy ortalyqta 56 kún boldy. Osy ýaqyt ishinde balanyń salmaǵy eki eseden astam artyp, 1 800 grammǵa jetti.
«Biz bul jerge kútpegen jerden tústik, eshkimdi tanymaityn edik. Alaida alǵashqy kúnnen bastap shynaiy qamqorlyqty sezindik. Dárigerler men medbikeler qyzymyzdyń densaýlyǵy men bolashaǵy úshin bar kúshin saldy. Olardyń kásibiligi men janqiiarlyǵy bizdi qatty tánti etti», — dep balanyń anasy meditsina qyzmetkerlerine alǵys bildirdi.
