الماتىنىڭ №2 قالالىق پەريناتالدىق ورتالىعىندا دارىگەرلەر جۇكتىلىكتىڭ 27-اپتاسىندا دۇنيەگە كەلگەن شالا تۋعان قىز بالانى امان الىپ قالدى. بۇل تۋرالى قالاداعى قوعامدىق دەنساۋلىق ساقتاۋ باسقارماسىنىڭ وكىلدەرى ايتتى، دەپ حابارلايدى Dalanews.kz
بولاشاق انا امنيوتيكالىق سۇيىقتىقتىڭ مەرزىمىنەن بۇرىن اعۋىنا بايلانىستى ورتالىققا شۇعىل تۇردە جەتكىزىلگەن. ۋلترادىبىستىق زەرتتەۋ ناتيجەسىندە ماماندار ىشتەگى نارەستەنىڭ ومىرىنە ءقاۋىپ ءتونىپ تۇرعانىن انىقتاپ، شۇعىل وتا جاساۋ تۋرالى شەشىم قابىلدادى.
كەسار تىلىگى ورتالىق ديرەكتورى سۆەتلانا راحيموۆا باستاعان دارىگەرلەر توبىنىڭ قاتىسۋىمەن جۇرگىزىلدى. سونىڭ ناتيجەسىندە سالماعى نەبارى 730 گرامم بولاتىن قىز بالا دۇنيەگە كەلدى.
نارەستە ءومىرىنىڭ العاشقى ساتىنەن باستاپ جاڭا تۋعان بالالاردىڭ جانساقتاۋ جانە قارقىندى تەراپيا بولىمىندە بولدى. 28 كۇن بويى دارىگەرلەر مەن مەدبيكەلەر ونىڭ جاعدايى ءۇشىن تاۋلىك بويى كۇرەستى.
جاعدايى تۇراقتانعان سوڭ ءسابي كۇتىمنىڭ ەكىنشى كەزەڭىنە — جاڭا تۋعان نارەستەلەر پاتولوگياسى بولىمىنە اۋىستىرىلدى. وتباسى ورتالىقتا 56 كۇن بولدى. وسى ۋاقىت ىشىندە بالانىڭ سالماعى ەكى ەسەدەن استام ارتىپ، 1 800 گراممعا جەتتى.
«ءبىز بۇل جەرگە كۇتپەگەن جەردەن تۇستىك، ەشكىمدى تانىمايتىن ەدىك. الايدا العاشقى كۇننەن باستاپ شىنايى قامقورلىقتى سەزىندىك. دارىگەرلەر مەن مەدبيكەلەر قىزىمىزدىڭ دەنساۋلىعى مەن بولاشاعى ءۇشىن بار كۇشىن سالدى. ولاردىڭ كاسىبيلىگى مەن جانقيارلىعى ءبىزدى قاتتى ءتانتى ەتتى»، — دەپ بالانىڭ اناسى مەديسينا قىزمەتكەرلەرىنە العىس ءبىلدىردى.
