Patrýldik politsiianyń eki ekipajy dabyldy shaqyrtý boiynsha oqiǵa ornyna tez jetti. Oqys oqiǵa saǵat 20:00-de boldy.
Kezekshi jedel ýákilden qońyraý kelip túskennen keiin, birneshe minýttan soń biz sol jerde boldyq. Syrttaǵy dárethanaǵa birneshe adam qulap ketkeni týraly bizge habarlandy. Biz barsaq, onyń syrty alynyp tastalypty, shuńqyrǵa baspaldaq arqyly tústik. Birinshi bolyp politsiia kapitany Murat Kákibekov tústi. Biz baspaldaqtan jáne onyń qolynan qatty ustadyq. Tereńdigi shamamen 3 metr, ol 1,5 metr deńgeiine deiin tolǵan. Murat er adamnyń qolynan ustap úlgerdi. Olar ony súirep shyǵardy. Kapitan Kákibekovtiń ornyna birden politsiia aǵa leitenanty Madiiar Tólembaev tústi. Ol bir jasar qyzdy taýyp, ony shyǵaryp aldy. Biraq, ókinishke orai, bala qaitys bolǵan. Osy kezde qutqarýshylar da keldi. Arnaiy jabdyqty qoldana otyryp, olar 56 jastaǵy áiel men 12 jasar balanyń denelerin alyp shyqty. Bir otbasy úshin aýyr, orny tolmas qaiǵy, - dedi Patrýldik politsiia polkiniń vzvod komandiri, politsiia kapitany Asyl Razbek.
Qutqarylǵan adam, politseilerdiń aitýynsha, jedel járdemge tapsyrylyp, aýrýhanaǵa jatqyzyldy.
Qaiǵyly jaǵdaidyń tizbegin ábden zerdelei kele, shyqqan qorytyndyǵa súiensek, keshke qarai úidiń aýlasynda oinap júrgen bir jasar qyzdyń baiqaýsyzda kóshedegi dárethanaǵa túsip ketken.
Muny kórgen 12 jasar aǵasy men 1955 jylǵy ájesi kómekke kelgen, olar kishkentai qyzdy shyǵaramyn dep júrip, ózderi de shuńqyrǵa qulaǵan.
Sodan keiin balalardyń 1980 jylǵy ákesi kómekke keledi. Dárethana syrtyn qulatyp, káriz qudyǵyna túsip ketken balalary men sheshesin shyǵaryp alýǵa tyrysa bastaidy. Alaida, kóp uzamai ol da esinen tanyp, shuńqyrǵa qulaidy, - dedi Naýryzbai aýdandyq politsiia bóliminiń bastyǵy, politsiia podpolkovnigi Didar Ahanov.
