Almatyda «Bereke» qarjylyq saýattylyq ortalyǵy ashyldy
Bul QR Ulttyq kitaphanasy men «Aigúl Ábdiraiymovanyń qarjy saýattylyq mektebi» birlesip, uiymdastyrǵan áleýmettik-bilim berý jobasy. Uiymdastyrýshylar atap ótkendei, jobanyń maqsaty – jastarǵa, jumys istep otyrǵan azamattarǵa, zeinetkerler men shaǵyn jáne orta biznes ókilderine qarjy salasyna qatysty keńes berý, oqytý.
– Biz azamattardyń túrli qalypta bilim alǵanyn qalaimyz. Ulttyq kitaphana bul jobany bir-aq kúnde qolǵa alǵan joq. Biz Almaty qalasy kásipkerler palatasymen eki jylǵa jýyq ýaqyt jumys istep kelemiz. Kitaphana bazasynda marketologtar, býhgalterler klýbtarynyń kezdesýlerin ótkizemiz. Taiaýda ǵana internet-marketing boiynsha oqytý kýrsy aiaqtaldy. Google men Iandeks sekildi halyqaralyq ozyq kompaniialardyń spikerleri almatylyqtarǵa dáris oqydy. «Bereke» qarjy saýattylyq ortalyǵy kásipkerlikti damytýǵa demeý bolady dep oilaimyn, – dedi QR Ulttyq kitaphana direktory Janat Seidýmanov.
Almaty kásipkerler palatasy direktorynyń mindetin atqarýshy Timýr Hakimov kásipkerlikti damytýdaǵy birlesken jumys tek arta túsetinin atap ótti.
– Búginde qarjy saýattylyǵyna qatysty jumystyń mańyzy zor. Bul halyqqa ǵana emes, bizneske de qatysty. Kásipkerler palatasynyń tájiribesine súiene otyryp, shaǵyn jáne orta biznes ókilderiniń arasynda anaǵurlym suranysy joǵary qyzmettiń úshten biri qarjylyq saýattylyq deńgeiin arttyrýǵa qatysty dep senimmen aitýǵa bolady. «Atameken» QR UPK óz jumysyn halyqty kásispkerlikke tartýǵa da baǵyttap otyr. Qarjylyq saýattylyq ortalyǵynyń tyńdaýshylary biznes-qoǵamdastyqtyń qataryn arttyratynyna kúmánim joq. Almaty qalasy kásipkerler palatasy árdaiym ortalyqtyń jumysyna zańdyq, býhgalterlik, marketingtik qyzmet kórsetetin kásibi mamandardy tartýǵa daiyn, – dedi Timýr Hakimov.
QR Ulttyq banki Almaty qalalyq filialy direktorynyń orynbasary Sálima Jurynovanyń aitýynsha, osyndai ortalyqty ashýdyń mańyzy zor. Ulttyq bank mindetteriniń biri – qarjylyq qyzmetti tutynýshylardyń quqyǵyn qorǵaý. Memlekettik retteý saraptamasy boiynsha Ulttyq bankke túsken ótinimderdiń 90%-y negizsiz. Jekelegen adamdar azamattardyń qarjylyq saýattylyǵynyń tómen ekendigin paidala otyryp, olardy adastyrady. Sonymen qatar kópshilik qarjysyn tiimdi jumsaýdy jáne qandai da bir qarjylyq qyzmetti alýdy bile bermeidi.
