Ábilhan Qasteev atyndaǵy QR Memlekettik óner mýzeiinde elimizdiń tanymal shyǵarmashyl áýletteriniń biri – Qasymbekovter otbasynyń týyndylaryna arnalǵan «Ónerli áýlet órnegi» atty kórme ashyldy, dep habarlaidy Dalanews.kz.
Qasymbekovter áýletiniń túp-tamyry Jetisý Alataýynyń etegindegi qasietti Taldy óńirinen bastaý alady. Tabiǵat pen tarih, ulttyq rýh pen óner toǵysqan bul mekennen shyqqan áýletke kórkemdik talǵam, eńbekqorlyq pen shyǵarmashylyq shabyt daryǵan.
Kórmege birneshe býyn ókilderi – soǵys ardageri, sýretshi ári ónertapqysh Ahmetqali Qasymbekovtiń urpaqtary: balalary Bolat, Manarbek, Janargúl, Begaiym, nemereleri Aiǵanym Dýlatqyzy, Gúlmira Appasova, Nazerke Manarbekqyzy, Iliias Sliamǵazy, Órken Qasymbekov, Ádemi Nurtileý jáne shóbereleri Hamza Dýlatuly men Alen Izbasarov qatysýda.
Ekspozitsiiada kórermender ár sýretshiniń ózindik qoltańbasyn, kórkem tildiń ýaqytpen birge damýyn jáne áýlettiń ortaq rýhani sabaqtastyǵyn baiqai alady.
Kórme jetekshisi Gúlmira Jubanovanyń aitýynsha, músinshi Bolat Qasymbekovtiń eńbekteri ekspozitsiianyń mańyzdy bóligin quraidy. Onda sheberdiń ár kezeńdegi eńbekteri qoiylǵan, sonyń ishinde: «Qorqyt» (2013), «Abyz ata» (2012), «Alma ustaǵan bala» (2012), «Abai Qunanbaev» (2019), «Dinmuhamed Qonaev» (2020), «Shahmat figýralary» (2023–2024) jáne 2024–2025 jyldary jasalǵan jańa qola týyndylary bar. Sonymen qatar, «Eltindi batyr», «Shoqan Ýálihanov», «S.Nurmaǵambetov», «Baǵai batyr» syndy monýmentaldy músinderdiń fotomaterialdary usynylǵan.
«Ónerli áýlet órnegi» kórmesi – Qasymbekovter áýletiniń shyǵarmashylyq shejiresin, otbasylyq dástúr men rýhani sabaqtastyqtyń mańyzyn pash etetin erekshe mádeni shara. Kórme ulttyq kórkem murany saqtaý men damytýǵa, jańa býyn sýretshilerine shabyt berýdi maqsat etedi.
