Almatyda qala ákimi Erbolat Dosaevtyń tapsyrmasymen zańsyz qurylysqa qarsy baqylaý jumystary kúsheitilip jatyr. 2022 jyldyń basynan 2025 jyldyń mamyryna deiin qalada ruqsatsyz salynǵan 88 nysan tolyǵymen nemese jartylai buzyldy. Bul týraly Almatynyń qala qurylysyn baqylaý basqarmasy málimdedi, dep habarlaidy Dalanews.kz
2025 jyly zańsyz salynǵan 18 ǵimarat súrildi. Olardyń ishinde turǵyn úi keshenderi, ákimshilik ǵimarattar, japsarjailar, dámhanalar, kólik jýý oryndary jáne basqa da qurylystar bar. Eń iri nysandar qatarynda «Mechta» taýnhaýsy, «KHAN» TÚK jáne Dostyq dańǵylyndaǵy 7 qabatty ákimshilik ǵimarat bar.
Taýly aimaqtaǵy zańsyz qurylysqa erekshe nazar aýdaryldy. Munda 38 nysanǵa qatysty sot sheshimi shyqqan, olardyń 12-si tolyq nemese jartylai buzylǵan.
Taǵy 3 nysanda qurylys jumystary bastapqy kezeńde toqtatylǵan.
Buzý jumystary tek sot sheshimi men tiisti qujattar negizinde, sot oryndaýshylarynyń qatysýymen júrgiziledi.
Zańsyz qurylystardy anyqtaý jáne toqtatý jumystary jalǵasýda.
«Zańsyz qurylysqa baqylaýdy kúsheitý – qazirgi kúnniń talaby. Qala infraqurylymyna, kólik jáne áleýmettik júiege júkteme artyp barady. Ruqsatsyz, beibereket qurylys tek qalanyń damýyna emes, turǵyndardyń qaýipsizdigine de tikelei qaýip tóndiredi. Ásirese, taýly aimaqtaǵy qurylysqa erekshe nazar aýdarý qajet. Bul aýmaqtar seismikalyq turǵydan álsiz ári qaýipti aimaqtar. Osyndai jerlerdegi zań buzýshylyqtar óte aýyr saldarǵa ákelýi múmkin. Eń bastysy, barlyq súrý jumysy zań aiasynda sot sheshimimen ǵana júzege asyrylyp jatyr. Bul barshaǵa ortaq ereje men ádilettilik kepili. Almatyda atqarylyp jatqan bul sharalar basqa qalalar úshin de úlgi bola alady», - dedi ýrbanist jáne qoǵam qairatkeri Gúlmira Baiǵabulova.
