Almatyda 14 jastaǵy jasóspirim Medeý aýdanynda jarylys jasaityny týraly jalǵan habarlama taratqan, dep habarlaidy Dalanews.kz.
Politsiianyń málimetinshe, jasóspirim «WhatsApp» messendjeri arqyly belgisiz nómirden turǵyn úilerdiń birinde jarylys uiymdastyratynyn jazǵan. Aqparat túse salysymen shuǵyl qyzmet ókilderi men saperler kórsetilgen mekenjaiǵa baryp, ǵimaratty tolyq tekserdi. Tekserý kezinde jarylǵysh zattar men kúmándi qurylǵylar tabylǵan joq.
Jedel izdestirý sharalarynyń nátijesinde habarlama avtory qysqa ýaqytta anyqtaldy. Ol sol aýdanda turatyn 14 jastaǵy jasóspirim bolyp shyqqan. Tergeý barysynda ol óz áreketin moiyndap, jalǵan aqparatty buzaqylyq maqsatta taratqanyn aitqan.
Atalǵan derek boiynsha QR Qylmystyq kodeksiniń 273-baby — «Terrorizm aktisi týraly kórineý jalǵan habarlaý» boiynsha sotqa deiingi tergeý bastaldy.
Almaty Politsiia departamenti bastyǵynyń orynbasary, politsiia podpolkovnigi Berik Ádilbekov málim etkendei, bul is boiynsha tergeý departamenttiń arnaiy basqarmasyna tapsyrylǵan.
«Terrorizm aktisi týraly jalǵan aqparat taratqandar alty jylǵa deiin bas bostandyǵynan aiyrylýy múmkin», — dep eskertti Berik Ádilbekov.
Quqyq qorǵaý organdary azamattarǵa, ásirese ata-analarǵa, balalardyń internettegi áreketterine muqiiat bolýdy jáne mundai habarlamalardyń saldary aýyr bolatynyn túsindirýdi eskertedi.
