Almatyda 13 kólikke zaqym kelgen Amanjol kóshesindegi shuńqyr úshin merdiger ákimshilik jaýapqa tartyldy, dep habarlaidy Dalanews.kz.
Almatynyń Qala qurylysyn baqylaý basqarmasy Sain, Shaliapin, Iassaýi jáne Jandosov kósheleriniń aýmaǵynda injenerlik jelilerdi júrgizip jatqan merdiger uiymǵa qatysty jospardan tys tekseristiń nátijesin habarlady.
Tekseris barysynda "SpetsStroi Grýpp LTD" JShS birqatar qurylys normasyn buzǵany anyqtaldy.
"Transheialardyń qiia betkeileri bekitilmegen, jergilikti dymqyl topyraq qabattap nyǵyzdalmastan qaita kómilip, keibir ýchaskelerde transheiaǵa jer asty sýlary tolyp qalǵan. Amanjol jáne ózge de kóshelerde inertti material tóselmegendikten, topyraqtyń tyǵyzdalý deńgeii talapqa sai bolmai shyqty. Sonyń saldarynan jaýyn-shashyn kezinde jol jabyndysy otyryp, tereń shuńqyrlar paida boldy", - dep jazylǵan ákimdik habarlamasynda.
Qala qurylysyn baqylaý basqarmasy merdiger uiymǵa anyqtalǵan kemshilikterdi 2025 jyly 8 qazanǵa deiin joiý jóninde nusqaý berdi. Eger belgilengen merzimde talaptar oryndalmasa, is sotqa joldanyp, zań aiasynda protsessýaldyq sheshim qabyldanady.
Eske salaiyq, 23 qyrkúiekte Almatyda jaýǵan qatty jańbyrdan keiin Amanjol kóshesiniń bir bóligi qaita búlindi. Jergilikti turǵyndardyń aitýynsha, jaýynnan keiin bul kóshe tutas aryqqa ainalady. Bir apta buryn dál osy jerde birden 13 kólik shuńqyrǵa túsip ketken edi.
