Almatyda 12 600 oqýshyǵa arnalǵan 8 mekteptiń qurylysy qarqyndy júrýde
Sapar Nurashevtyń aitýynsha, jyl sońyna deiin 48 áleýmettik nysannyń qurylysyn aiaqtaý josparlanýda. Onyń ishinde 38 nysannyń qurylysy júrip jatyr, al 10-y seismikalyq kúsheitý jáne ǵimarattarǵa kúrdeli jóndeý.
– Qazirgi ýaqytta 12 600 oqýshyǵa arnalǵan segiz mekteptiń, 17 mektepke arnalǵan jańa ǵimarattar men №7 qalalyq aýrýhananyń qurylysy júrgizilýde. Kishi Almaty ózeniniń jaǵalaýyn jáne Jambyl kóshesin Dostyq dańǵylynan Naýryzbai batyr kóshesine deiin rekonstrýktsiialaý aiaqtalýǵa jaqyn, – dedi Sapar Nurashev.
№7, 40, 45, 54 mektepter men №16, 114, 116, 141 bóbekjai-balabaqshalarynyń ǵimarattaryn jóndeý jumystary men seismikalyq nyǵaitý jumystary júrgizilýde.
Spikerdiń aitýynsha, Almatydaǵy barlyq jańa mektepterdi salýda zamanaýi álemdik standarttar jáne sońǵy jetistikter eskeriledi. Ol qazirgi balalardyń zamanaýi qural-jabdyqtarmen jabdyqtalǵan jańa keńistikte bilim alýǵa qyzyǵýshylyq tanytady dep esepteidi. Sondyqtan Almatyda jańa tiptegi mektepterdiń qurylys protsesi jalǵasady.
Sonymen qatar, Alataý aýdanynda Tennis ortalyǵynyń, Jas-Qanat, Qulager, Alataý, Ainabulaq-2, Kemel shaǵyn aýdandarynda dene shynyqtyrý-saýyqtyrý keshenderiniń qurylysyn aiaqtaý josparlanýda.
Sondai-aq 2021 jyly 21 joba iske qosyldy. Mektepter men balabaqshalar kúrdeli jóndeýden ótedi, Kemel shaǵyn aýdanynda aýysymyna 200 kelýshige arnalǵan otbasylyq-dárigerlik ambýlatoriia, Balalardyń jedel járdem ortalyǵy, Depo Evolution Park, úisizderge áleýmettik kómek kórsetý ortalyǵy, Memlekettik qýyrshaq teatrynyń jańa ǵimarattary, al Bostandyq aýdanynda tórt kólikke arnalǵan órt sóndirý deposy salynady.
