ساپار نۇراشيەۆتىڭ ايتۋىنشا، جىل سوڭىنا دەيىن 48 الەۋمەتتىك نىساننىڭ قۇرىلىسىن اياقتاۋ جوسپارلانۋدا. ونىڭ ىشىندە 38 نىساننىڭ قۇرىلىسى ءجۇرىپ جاتىر، ال 10-ى سەيسميكالىق كۇشەيتۋ جانە عيماراتتارعا كۇردەلى جوندەۋ.
– قازىرگى ۋاقىتتا 12 600 وقۋشىعا ارنالعان سەگىز مەكتەپتىڭ، 17 مەكتەپكە ارنالعان جاڭا عيماراتتار مەن №7 قالالىق اۋرۋحانانىڭ قۇرىلىسى جۇرگىزىلۋدە. كىشى الماتى وزەنىنىڭ جاعالاۋىن جانە جامبىل كوشەسىن دوستىق داڭعىلىنان ناۋرىزباي باتىر كوشەسىنە دەيىن رەكونسترۋكسيالاۋ اياقتالۋعا جاقىن، – دەدى ساپار نۇراشيەۆ.
№7، 40، 45، 54 مەكتەپتەر مەن №16، 114، 116، 141 بوبەكجاي-بالاباقشالارىنىڭ عيماراتتارىن جوندەۋ جۇمىستارى مەن سەيسميكالىق نىعايتۋ جۇمىستارى جۇرگىزىلۋدە.
سپيكەردىڭ ايتۋىنشا، الماتىداعى بارلىق جاڭا مەكتەپتەردى سالۋدا زاماناۋي الەمدىك ستاندارتتار جانە سوڭعى جەتىستىكتەر ەسكەرىلەدى. ول قازىرگى بالالاردىڭ زاماناۋي قۇرال-جابدىقتارمەن جابدىقتالعان جاڭا كەڭىستىكتە ءبىلىم الۋعا قىزىعۋشىلىق تانىتادى دەپ ەسەپتەيدى. سوندىقتان الماتىدا جاڭا تيپتەگى مەكتەپتەردىڭ قۇرىلىس پروسەسى جالعاسادى.
سونىمەن قاتار، الاتاۋ اۋدانىندا تەننيس ورتالىعىنىڭ، جاس-قانات، قۇلاگەر، الاتاۋ، اينابۇلاق-2، كەمەل شاعىن اۋداندارىندا دەنە شىنىقتىرۋ-ساۋىقتىرۋ كەشەندەرىنىڭ قۇرىلىسىن اياقتاۋ جوسپارلانۋدا.
سونداي-اق 2021 جىلى 21 جوبا ىسكە قوسىلدى. مەكتەپتەر مەن بالاباقشالار كۇردەلى جوندەۋدەن وتەدى، كەمەل شاعىن اۋدانىندا اۋىسىمىنا 200 كەلۋشىگە ارنالعان وتباسىلىق-دارىگەرلىك امبۋلاتوريا، بالالاردىڭ جەدەل جاردەم ورتالىعى، Depo Evolution Park، ۇيسىزدەرگە الەۋمەتتىك كومەك كورسەتۋ ورتالىعى، مەملەكەتتىك قۋىرشاق تەاترىنىڭ جاڭا عيماراتتارى، ال بوستاندىق اۋدانىندا ءتورت كولىككە ارنالعان ءورت ءسوندىرۋ دەپوسى سالىنادى.
