1 mamyrdan bastap Almatyda sýburqaqtar maýsymy resmı túrde bastalady. Olar kún saıyn saǵat 08:00-den 23:00-ge deıin jumys isteıdi,- dep habarlaıdy Dalanews.kz
Olardyń jumysy 1 qazanǵa deıin sozylady. Bul rette, qoldanystaǵy erejelerge sáıkes +5°C tómen temperatýrada sýburqaqtardy paıdalanýǵa tyıym salynady.
Aǵymdaǵy maýsymda 56 komýnaldyq sýburqaq kesheni iske qosylady, onyń 11-i «qurǵaq». Sýburqaqtarǵa tehnıkalyq qyzmet kórsetý men sanıtarlyq jaǵdaıdy Almaty qalasy qoǵamdyq keńistikterdi damytý basqarmasynyń vedimistik baǵynysty uıymy - «Eco Almaty» JSHS qamtamasyz etedi.
Kóktemgi kezeńniń bastalýymen mamandar sýburqaqtardy keshendi daıyndaýdy júrgizdi: tostaǵandar men irgeles aýmaqty tazartý, hlor men mys súlfatyn paıdalanyp sýdy zararsyzdandyrý, jabdyqty boıaý jáne jóndeý, sondaı-aq barlyq ınjenerlik júıelerdi tekserý. Mundaı sharalar qalalyq sýburqaqtardyń qaýipsiz jáne turaqty jumysyn qamtamasyz etýge múmkindik beredi.
Esterińizge sala keteıik, aǵymdaǵy jyldyń sáýir aıynda Almatyda tórt ortalyq sýburqaqty: ákimdik ǵımaratynyń janyndaǵy Shyǵys jáne Batys sýburqaqtardy, Respýblıka alańyndaǵy sýburqaqty jáne Ǵ.Músirepov atyndaǵy teatrdyń janyndaǵy sýburqaqty aýqymdy qaıta jańartý bastaldy. Bul nysandarda bólshekteý jumystary júrgizilýde. İrgeles aýmaqtardy qaıta qurý men abattandyrýdy 2025 jyldyń qazan aıynda tolyq aıaqtaý josparlanýda. Jańartýdan keıin bul sýburqaqtar qala turǵyndary men megapolıs qonaqtary úshin zamanaýı, qaýipsiz jáne jaıly demalys oryndaryna aınalady.
Qalanyń alty sýburqaǵyna aǵymdaǵy jóndeý júrgizý máselesi qosymsha qarastyrylýda.
Almaty sýburqaqtary-bul ınjenerlik qurylystar ǵana emes, sonymen qatar qalalyq biregeılik pen kórneki mádenıettiń mańyzdy elementteri. Olardy qalpyna keltirý jáne jańartý — estetıkalyq, jaıly jáne qaýipsiz qoǵamdyq keńistikti qurýǵa jasalǵan qadam.
