1 мамырдан бастап Алматыда субұрқақтар маусымы ресми түрде басталады. Олар күн сайын сағат 08:00-ден 23:00-ге дейін жұмыс істейді,- деп хабарлайды Dalanews.kz
Олардың жұмысы 1 қазанға дейін созылады. Бұл ретте, қолданыстағы ережелерге сәйкес +5°C төмен температурада субұрқақтарды пайдалануға тыйым салынады.
Ағымдағы маусымда 56 коммуналдық субұрқақ кешені іске қосылады, оның 11-і «құрғақ». Субұрқақтарға техникалық қызмет көрсету мен санитарлық жағдайды Алматы қаласы қоғамдық кеңістіктерді дамыту басқармасының ведомстволық бағынысты ұйымы - «Eco Almaty» ЖШС қамтамасыз етеді.
Көктемгі кезеңнің басталуымен мамандар субұрқақтарды кешенді дайындауды жүргізді: тостағандар мен іргелес аумақты тазарту, хлор мен мыс сульфатын пайдаланып суды зарарсыздандыру, жабдықты бояу және жөндеу, сондай-ақ барлық инженерлік жүйелерді тексеру. Мұндай шаралар қалалық субұрқақтардың қауіпсіз және тұрақты жұмысын қамтамасыз етуге мүмкіндік береді.
Естеріңізге сала кетейік, ағымдағы жылдың сәуір айында Алматыда төрт орталық субұрқақты: әкімдік ғимаратының жанындағы Шығыс және Батыс субұрқақтарды, Республика алаңындағы субұрқақты және Ғ.Мүсірепов атындағы театрдың жанындағы субұрқақты ауқымды қайта жаңарту басталды. Бұл нысандарда бөлшектеу жұмыстары жүргізілуде. Іргелес аумақтарды қайта құру мен абаттандыруды 2025 жылдың қазан айында толық аяқтау жоспарлануда. Жаңартудан кейін бұл субұрқақтар қала тұрғындары мен мегаполис қонақтары үшін заманауи, қауіпсіз және жайлы демалыс орындарына айналады.
Қаланың алты субұрқағына ағымдағы жөндеу жүргізу мәселесі қосымша қарастырылуда.
Алматы субұрқақтары-бұл инженерлік құрылыстар ғана емес, сонымен қатар қалалық бірегейлік пен көрнекі мәдениеттің маңызды элементтері. Оларды қалпына келтіру және жаңарту — эстетикалық, жайлы және қауіпсіз қоғамдық кеңістікті құруға жасалған қадам.
