Almatyda jylý qyzmetine artyq tólem zańsyz qosylǵany anyqtaldy. Básekelestikti qorǵaý jáne damytý agenttigi qala turǵyndaryna jylýmen qamtý boiynsha kórsetiletin qyzmettiń birinde negizsiz tólem eseptelgenin málimdedi, dep habarlaidy Dalanews.kz.
Agenttiktiń dereginshe, Almaty qalalyq departamenti «Almaty jylý jelisi» JShS-niń (AlTS) áreketterinen monopoliialyq jaǵdaidy teris paidalaný belgilerin tapqan. Bul jaǵdai jylý energiiasyn paidalanatyn birqatar tutynýshynyń quqyqtaryn shektegen.
«Tekserý barysynda tabiǵi monopoliia sýbektisi — AlJJ — tutynýshylardy jylýǵa qaita qosý qyzmetiniń tarifine 10 paiyz kóleminde paida qosqan. Alaida qoldanystaǵy erejelerge sáikes, jylýǵa qaita qosý kezinde monopolist kompaniianyń paida tabýyna jol berilmeidi», — dep málimdedi agenttik.
Bul fakti boiynsha kompaniiaǵa zańnamany buzý belgileri jóninde resmi habarlama jiberilgen.
«Habarlama tolyǵymen oryndaldy. Monopolist engizgen 10 paiyzdyq paida alynyp tastaldy, nátijesinde almatylyqtar úshin jylýǵa qaita qosý qyzmetiniń quny dál osy mólsherge arzandady», — dedi vedomstvo.
