Lázzat Jylqybaeva oqý úderisin qashyqtyqtan uıymdastyrý úshin barlyq qajetti jaǵdaılar jasalǵanyn atap ótti. Qala boıynsha Internetpen jaǵdaı turaqtandy jáne oǵan mektepterdiń qoljetimdiligi de qamtamasyz etildi.
Sonymen qatar, ol ata-analar kompúterlerge nemese noýtbýkterge, sondaı-aq ınternetke qatysty qosymsha qajettilik týyndaǵan jaǵdaıda mekteptiń birinshi basshylaryna nemese aýdandyq bilim berý bólimderine júgine alatynyn, onda olarǵa osy máselelerdi sheshýge kómektesetinin eske saldy.
Oqytý úshin platformalar anyqtaldy (bul Online Mektep, Bilim Land, Microsoft Teams), sonymen qatar mektepter oqýshylarǵa yńǵaıly bolý úshin buryn qashyqtyqtan oqytý kezinde qoldanylǵan platformalardy óz betinshe tańdaı alady.
– Qashyqtyqtan oqytý formatynda jumys tájirıbesi bizde bar, muǵalimder ótken jyly sıfrlyq saýattylyqty arttyrý kýrstarynan ótip, óz jumystaryn onlaın-rejımde jetildirýdi jalǵastyrady, – dep habarlady Almaty Bilim basqarmasynyń basshysy.
Baspasóz konferensıasy barysynda tótenshe jaǵdaı rejımi aıaqtalǵannan keıin mektepke deıingi uıymdardyń jumysyn 20 qańtardan bastap qaıta bastaý josparlanǵany belgili boldy. Eske salsaq, 5 qańtardan bastap olardyń qyzmeti ýaqytsha toqtatyldy. Almatyda barlyǵy 860 balabaqsha bar, onyń 190-y memlekettik. Almatyda 71 myńnan astam bala mektepke deıingi bilimmen qamtylǵan.
Lázzat Jylqybaeva balabaqshalar kúrdeli epıdemıologıalyq jaǵdaıǵa baılanysty kezekshi toptar rejıminde jumys isteıtinin joqqa shyǵarmaıdy. Mektepke deıingi mekemeler jumysynyń tártibi týraly qosymsha habarlaıtyn bolady.
24 qańtardan bastap Almatyda 83 kolejde 73 myńnan astam stýdent oqýǵa kirisedi. Olar úshin oqytýdyń aralas formaty kózdelgen, sondyqtan dáristik sabaqtar onlaın-rejımde ótedi, al praktıkalyq sabaqtar sanıtarıalyq talaptardy saqtaı otyryp, ıkemdi keste boıynsha oflaın uıymdastyrylady.
Qosymsha bilim berý uıymdarynda 10 adamǵa deıin jeke jáne toptyq sabaqtar oflaın, qalǵan sabaqtar onlaın-rejımde ótkiziletin bolady.
Lázzat Jylqybaeva muǵalimdermen jáne ata-analarmen keri baılanysty qamtamasyz etý úshin bilim basqarmasynda, aýdandyq bilim bólimderinde jáne árbir bilim berý uıymynda 3-toqsannyń basynan bastap birneshe CALL-ortalyqtardyń jumysy jandandyrylatynyn (nómirler vedomstvonyń saıtynda jáne áleýmettik jelilerde ornalastyrylady), onda qyzyqtyratyn máseleler boıynsha júginýge nemese keńes alýǵa bolady.
Sóziniń sońynda Almaty qalasy Bilim basqarmasynyń basshysy ata-analar men bilim berý uıymdarynyń qyzmetkerlerin qaýipsizdik sharalary men sanıtarlyq talaptardy saqtaýǵa shaqyrdy. Ol sondaı-aq saqtaýǵa jáne halyqty vaksınalanýǵa ári revaksınalanýǵa shaqyrdy.
