ءلاززات جىلقىبايەۆا وقۋ ۇدەرىسىن قاشىقتىقتان ۇيىمداستىرۋ ءۇشىن بارلىق قاجەتتى جاعدايلار جاسالعانىن اتاپ ءوتتى. قالا بويىنشا ينتەرنەتپەن جاعداي تۇراقتاندى جانە وعان مەكتەپتەردىڭ قولجەتىمدىلىگى دە قامتاماسىز ەتىلدى.
سونىمەن قاتار، ول اتا-انالار كومپيۋتەرلەرگە نەمەسە نوۋتبۋكتەرگە، سونداي-اق ينتەرنەتكە قاتىستى قوسىمشا قاجەتتىلىك تۋىنداعان جاعدايدا مەكتەپتىڭ ءبىرىنشى باسشىلارىنا نەمەسە اۋداندىق ءبىلىم بەرۋ بولىمدەرىنە جۇگىنە الاتىنىن، وندا ولارعا وسى ماسەلەلەردى شەشۋگە كومەكتەسەتىنىن ەسكە سالدى.
وقىتۋ ءۇشىن پلاتفورمالار انىقتالدى (بۇل Online Mektep، Bilim Land، Microsoft Teams)، سونىمەن قاتار مەكتەپتەر وقۋشىلارعا ىڭعايلى بولۋ ءۇشىن بۇرىن قاشىقتىقتان وقىتۋ كەزىندە قولدانىلعان پلاتفورمالاردى ءوز بەتىنشە تاڭداي الادى.
– قاشىقتىقتان وقىتۋ فورماتىندا جۇمىس تاجىريبەسى بىزدە بار، مۇعالىمدەر وتكەن جىلى سيفرلىق ساۋاتتىلىقتى ارتتىرۋ كۋرستارىنان ءوتىپ، ءوز جۇمىستارىن ونلاين-رەجيمدە جەتىلدىرۋدى جالعاستىرادى، – دەپ حابارلادى الماتى ءبىلىم باسقارماسىنىڭ باسشىسى.
باسپا ءسوز كونفەرەنسياسى بارىسىندا توتەنشە جاعداي رەجيمى اياقتالعاننان كەيىن مەكتەپكە دەيىنگى ۇيىمداردىڭ جۇمىسىن 20 قاڭتاردان باستاپ قايتا باستاۋ جوسپارلانعانى بەلگىلى بولدى. ەسكە سالساق، 5 قاڭتاردان باستاپ ولاردىڭ قىزمەتى ۋاقىتشا توقتاتىلدى. الماتىدا بارلىعى 860 بالاباقشا بار، ونىڭ 190-ى مەملەكەتتىك. الماتىدا 71 مىڭنان استام بالا مەكتەپكە دەيىنگى بىلىممەن قامتىلعان.
ءلاززات جىلقىبايەۆا بالاباقشالار كۇردەلى ەپيدەميولوگيالىق جاعدايعا بايلانىستى كەزەكشى توپتار رەجيمىندە جۇمىس ىستەيتىنىن جوققا شىعارمايدى. مەكتەپكە دەيىنگى مەكەمەلەر جۇمىسىنىڭ ءتارتىبى تۋرالى قوسىمشا حابارلايتىن بولادى.
24 قاڭتاردان باستاپ الماتىدا 83 كوللەدجدە 73 مىڭنان استام ستۋدەنت وقۋعا كىرىسەدى. ولار ءۇشىن وقىتۋدىڭ ارالاس فورماتى كوزدەلگەن، سوندىقتان دارىستىك ساباقتار ونلاين-رەجيمدە وتەدى، ال پراكتيكالىق ساباقتار سانيتاريالىق تالاپتاردى ساقتاي وتىرىپ، يكەمدى كەستە بويىنشا وفلاين ۇيىمداستىرىلادى.
قوسىمشا ءبىلىم بەرۋ ۇيىمدارىندا 10 ادامعا دەيىن جەكە جانە توپتىق ساباقتار وفلاين، قالعان ساباقتار ونلاين-رەجيمدە وتكىزىلەتىن بولادى.
ءلاززات جىلقىبايەۆا مۇعالىمدەرمەن جانە اتا-انالارمەن كەرى بايلانىستى قامتاماسىز ەتۋ ءۇشىن ءبىلىم باسقارماسىندا، اۋداندىق ءبىلىم بولىمدەرىندە جانە ءاربىر ءبىلىم بەرۋ ۇيىمىندا 3-توقساننىڭ باسىنان باستاپ بىرنەشە CALL-ورتالىقتاردىڭ جۇمىسى جانداندىرىلاتىنىن (نومىرلەر ۆەدومستۆونىڭ سايتىندا جانە الەۋمەتتىك جەلىلەردە ورنالاستىرىلادى)، وندا قىزىقتىراتىن ماسەلەلەر بويىنشا جۇگىنۋگە نەمەسە كەڭەس الۋعا بولادى.
ءسوزىنىڭ سوڭىندا الماتى قالاسى ءبىلىم باسقارماسىنىڭ باسشىسى اتا-انالار مەن ءبىلىم بەرۋ ۇيىمدارىنىڭ قىزمەتكەرلەرىن قاۋىپسىزدىك شارالارى مەن سانيتارلىق تالاپتاردى ساقتاۋعا شاقىردى. ول سونداي-اق ساقتاۋعا جانە حالىقتى ۆاكسينالانۋعا ءارى ريەۆاكسينالانۋعا شاقىردى.
