Almaty oblysynyń turǵyny jeke medortalyqta shuǵyl kómek kórsetilmegenine narazy. 65 jastaǵy naýqas klinikada jasalǵan protsedýradan soń jaǵdaiynyń kúrt nasharlap ketkenin aitady. Dárigerler naýqasta infarkttyń alǵashqy belgilerin baiqap, em-sharany bastaýdyń ornyna, jedel járdemmen ózge aýrýhanaǵa jibere salypty, - dep habarlaidy Dalanews.kz KTK telearnasyna siltep.
«Sonyń kesirinen ajal qusha jazdadym» - deidi er adam. Osy jaǵdaidan keiin meditsinalyq ortalyqta tekseris júrgizilip, óreskel zańbuzýshylyqtar anyqtalǵan kórinedi. Dese de, bul klinikadaǵylar «jumysymyzda min joq» dep otyr. 65 jastaǵy Baýyrjan Qundaqbaev qazir dárisiz qalypty ómir súre almaidy.
Naýqas osyǵan deiin úsh ret infarkt alǵan. Sońǵy jaǵdaida, tipti, ólim aýzynan aman qalypty. Ol mamyrda myna meditsinalyq ortalyqqa elektrokardiografiia jasatý úshin barǵan. Biraq dárigerler koronarografiia degen protsedýra jasap, jaǵdaiym kúrt nasharlap ketti deidi er adam.
Baýyrjan Qundaqbaev: — Shydai almai ketken kezde aittym: «qarańdarshy, asqynyp itur, denem qalshyldap otyrmyn». Sol kezde baryp, «sizde infarkt eken» dedi. Ózderi kelisti de, jedel járdem shaqyraiyq dedi. Shyn máninde ólim aýzynda jatqan adamdy bular aldy da, basqa aýrýhanaǵa jiberdi. Aýqymdy infarkt alyp jatqan adamdy sol jerden bular eshqaida jibermei, emdeýi kerek edi, ne bolsa da. Qalai bular qoryqpai, meni jedel járdem kóligine salyp, anaý-mynaý aýrýhanaǵa dedi?!
Naýqas jedel járdemmen qalanyń ózge bóligindegi kardiologiia institýtyna jetkizilipti. Onda Baýyrjan Qundaqbaevqa tórt saǵat ota jasalǵan. Dárigerler er adamdy ajaldan áreń arashalap qalǵan kórinedi. «Kórer jaryǵym bar eken» degen naýqas jeke klinikadaǵy aq halattylardyń shuǵyl kómek kórsetpegenine qapaly. Al mundaǵy mamandar onyń sózin joqqa shyǵaryp otyr ári shuǵyl kardiologiialyq kómek kórsetýge qujat júzinde ruqsatymyz joq deidi.
Nurjamal Qarajanova, «Hirýrgiia institýty» JShS kardiologiia bóliminiń meńgerýshisi: — Árine, jedel kómek kórsetilýi kerek. Biz qalanyń densaýlyq saqtaý basqarmasy buiryǵy boiynsha jumys isteimiz. Naýryzdan bastap, bul «Hirýrgiia institýty» JShS-de kórsetilmeidi, jedel kooranarlyq sindrom kezinde, iaǵni infarkt bolyp jatyr» degen sóz, «bastalyp jatyr» degen sóz. Ol bizde kórsetilmeidi. Sondyqtan buiryq boiynsha biz ony jatqyzyp, emdei almadyq.
Osy jaǵdaidan soń, naýqastyń shaǵymy boiynsha Almaty qalasynyń bas shtattan tys kardiology bastaǵan top klinikada tekseris júrgipti. Monitoring qorytyndysy áleýmettik jelilerde jariialanyp ta úlgergen. Oǵan sáikes, mamandar bul jerden birneshe óreskel zańbuzýshylyq anyqtaǵan. Máselen, klinikada naýqastarǵa durys diagnoz qoiylmaǵan, aýrý tarihy da jóndi júrgizilmegen. Sonyń kesirinen bir adam ajal qushqan kórinedi.
Almaty qoǵamdyq densaýlyq saqtaý basqarmasy: — Ortalyqta arnaiy balalar kardiohirýrgy bolmasa da, 2 balaǵa ashyq ota jasalǵan. Taǵy bir eresek naýqasty hattamaǵa sáikes emdemegen. Iaǵni koronarografiianyń ornyna ota jasalyp, sonyń saldarynan naýqas qaitys bolǵan. Mundai jaǵdailar QR Densaýlyq saqtaý ministrliginiń buiryǵyn óreskel buzý bolyp esepteledi.
Sondyqtan tekseris júrgizgen mamandar áleýmettik meditsinalyq saqtandyrý qoryna «Hirýrgiia institýty» Jaýapkershiligi shekteýli seriktestigin shuǵyl jáne josparly kardiologiialyq, kardiohirýrgiialyq jáne aritmologiialyq kómekterden shettetýdi usynypty.
