Almaty oblysynyń eks-ákimi Ańsar Musahanov ómirden ótti, dep habarlaidy Dalanews.kz.
Qaiǵyly habardy senator Janbolat Jórgenbaev facebook paraqshasynda habarlady.
"Ómirde bolmysy bólek, ustanymy berik zamandasymyzdyń aitar asyl oilary men halqyna berer paidasy mol edi. Ómirlik jolynda adal eńbek etip, abyroimen ótkizgen, oń isteriniń jemisin qaldyrǵan ardaqty azamattyń jarqyn beinesi árdaiym jadymyzda", dep jazdy senator.
Musahanov Ańsar Tursynhanuly (1966 jyly Almaty oblysy, Kúrti aýdanynda dúniege kelgen) - Almaty oblysynyń burynǵy ákimi.
Almaty mal dárigerlik institýtyn, Qazaq ulttyq agrarlyq ýniversitetin bitirgen, mamandyǵy boiynsha - mal dárigeri, memlekettik jáne jergilikti basqarý menedjeri. Aýyl sharýashylyǵy ǵylymynyń kandidaty.
Eńbek jolyn Kúrti aýdanyndaǵy «Quiǵan» sovhozynda jumysshy bolyp bastady. Joǵary oqý ornyn bitirgennen keiin ár jyldary «KSRO-nyń 60 jyldyǵy» atyndaǵy keńsharda mal dárigeri, Kúrti aýdanynyń bas mal dárigeri, Jambyl aýdany Uzynaǵash stantsiiasy mal ýchaskesiniń meńgerýshisi, Temirjol aýyldyq okrýginiń ákimi, Aqseńgir tájiribelik sharýashylyǵynyń direktory, «Qazybek bek» JShS direktory bolyp jumys istedi. Almaty oblysynyń memlekettik basqarý organdarynda basshy laýazymdarda qyzmet atqardy. QR Aýyl sharýashylyǵy ministrligi Qarasai aýdandyq aýmaqtyq basqarmasynyń bastyǵy, Ile aýdany ákiminiń orynbasary, Jambyl jáne Qarasai aýdandarynyń ákimi, Qazaqstan Respýblikasy Prezidenti Ákimshiliginiń memlekettik inspektory, Almaty oblysy ákiminiń orynbasary qyzmetterin atqardy.
