Almaty oblysynda týrizm áleýeti qarqyndy damyp keledi. Buǵan oblystyq týrizm basqarmasynyń uiymdastyrýymen ótken aqparattyq týr barysynda BAQ ókilderi kýá boldy, dep habarlaidy Dalanews.kz.
Sapar barysynda qatysýshylar óńirdiń negizgi týristik nysandaryn aralap, ASP Arena kópfýnktsionaldy kesheni, “Kóshpendiler qalashyǵy” etnomádeni ortalyǵy jáne Shonjydaǵy demalys aimaqtarynyń infraqurylymymen tanysyp qaitty.
ASP Arena kesheni
Týrdyń alǵashqy baǵyty Qonaev qalasynda ornalasqan, halyqaralyq deńgeidegi sporttyq jarystar men buqaralyq is-sharalarǵa arnalǵan ASP Arena kesheninen bastaldy.
ASP Club art-direktorynyń aitýynsha, keshen aýmaǵynda qonaqúi, meiramhana, karting, taksi qyzmeti, kiberzona jáne demalys alańdary bar. Qazir munda Orta Aziiadaǵy eń úlken muz aidyny salynyp jatyr.
“Joba zamanaýi jabdyqtarmen jabdyqtalǵan. Bir seans kezinde shamamen 40 myńǵa deiin kelýshini qabyldai alamyz. Kompaniia enshisinde ártúrli ólshemdegi 5 myń jup jańa konki bar”, - deidi Natalia.
Kóshpendiler qalashyǵy
Kelesi mańyzdy baǵyttarynyń biri 2004 jyly salynǵan, tanymal filmder túsirilgen tarihi-etnomádeni keshen “Kóshpendiler qalashyǵy” boldy. Munda “Myń bala”, “Kóshpendiler”, “Tomiris” siiaqty týyndylar túsirilgen.
Almaty oblysy týrizm basqarmasynyń ókili Fariza Serikbaiqyzynyń aitýynsha, nysan búginde týristik ortalyqqa ainalyp keledi.
“Oblys ákimdiginiń qoldaýymen jańa jol salynyp, jaryqtandyrý júiesi júrgizildi. Týristerdi kóbirek tartý úshin aldaǵy ýaqytta keshen tolyq jóndeýden ótedi”, - deidi ol.
Sózinshe, lokatsiia etnotýrizm, kinotýrizm jáne mádeni týrizm baǵytynda joǵary áleýetke ie.
“Kóshpendiler qalasy Ile ózeniniń boiynda ornalasqan jáne bolashaqta tolyqqandy týristik keshenge ainalady. Nysan jeke menshik iesiniń qaraýynda, rekonstrýktsiia da jeke kásipkerdiń qatysýymen júzege asady. Túsirilimder arnaiy ruqsat arqyly ǵana júrgiziledi”, — dep qosty ol.
Shonjydaǵy demalys aimaqtary
Aqparattyq týr barysynda qatysýshylar Shonjy óńirindegi saýyqtyrý-týrizm klasterimen de tanysty. Bul baǵyt termaldy bulaqtarǵa negizdelgen demalys jáne wellness-týrizm nysandarymen erekshelenedi.
Máselen, qatysýshylar aialdaǵan All Seasons demalys kesheni jyl saiyn 30-35 myńǵa deiin týrist qabyldaidy. Nómirleriniń baǵasy 50 myń teńgeden bastalady. Munda demalys pen saýyqtyrýǵa arnalǵan infraqurylym jolǵa qoiylǵan.
Sonymen qatar qatysýshylar ECO Park demalys aimaǵynyń jumysymen de tanysty. Keshen bir kúnde 200-ge deiin týrist qabyldai alady. Munda da qonaqúi baǵasy 50 myń teńgeden bastalady. Sonymen qatar 3 meiramhana, spa aimaqtary men massaj qyzmeti bar.
“Biyl qonaqúide jóndeý jumystary turaqty túrde júrgizilip jatyr. Iaǵni, sýmen jabdyqtaý júiesi men tehnikalyq quraldar jańardy. Keibir bólmeler jóndeýde bolǵanymen, qyzmet kórsetý jalǵasyp jatyr”, – deli ECOpark ortalyǵynyń basshylyǵy.
Aitýlarynsha, aqpan aiynan bastap nysan memleket qaraýyna berilip, halyqaralyq deńgeidegi týristik joba retinde qarastyrylmaq. Bul múmkindik Qazaqstan Respýblikasynyń árbir azamatyna, sonyń ishinde múmkindigi shekteýli jandarǵa, qarttarǵa jáne zeinetkerlerge arnalǵan. Qonaqúide usynylatyn barlyq emdik jáne demalys qyzmetteri memlekettik tapsyrys arqyly tegin usynylady.
“Baǵyt boiynsha bes ret tamaqtaný, mineraldy sý paidalaný jáne arnaiy emdik baǵdarlamalar bar. Bolashaqta atqa miný múmkindigin de usynamyz. Biz ECOpark-ty halyqaralyq deńgeidegi kýrortqa ainaldyrýdy maqsat etip otyrmyz”, – deidi basshylyq.
Kelesi núkte FourSeasons qonaq úii boldy. Bul demalys nysany da Qazaqstandaǵy týristik baǵytty damytýda mańyzdy ról atqaryp otyr. Iaǵni, sheteldik jáne qazaqstandyq týristerge zamanaýi qyzmet kórsete alady.
Sondai-aq qatysýshylardyń Nammu Resort demalys aimaǵyna da joldary tústi. Nysan basshysy Temirǵali Esenniń aitýynsha, qonaqúidiń ashylǵanyna nebári 3 ai bolǵan.
“Demalys ornymyzdy zamanaýi tehnologiialarmen, sheteldik standarttarǵa sai etip jasadyq”, – deidi ol.
Sózinshe, qazirgi tańda Nammu Resort-ta júzge jýyq qyzmetker jumys isteidi. Qonaqúide 12 túrli jabyq bassein men monshalar bar.
“Bir kúnde 120-ǵa jýyq adamdy qabyldai alamyz. Úsh aidyń ishinde demalys aimaǵy 2 myńnan astam qonaqty qabyldady”, — deidi ol.
Temirǵali Esen demalys ornyna sheteldik qonaqtar da belsendi túrde at basyn buryp jatqanyn atap ótti.
“Qazirgi ýaqytta indoneziialyq týrister qonaqúide demalyp jatyr. Sondai-aq qyrǵyzstandyq jáne reseilik týrister de jii keledi”, — dedi ol.
Logistika
Ekskýrsiia barysynda qatysýshylar Shonjy avtostantsiiasynyń jumysymen de tanysty. Avtovokzal basshysy Saýytjan Erboldyń aitýynsha, nysanǵa 2025 jyldyń sáýirinen bastap daiyndyq jumystary júrgizilgen.
“Infraqurylymy tolyq daiyn. Jolaýshylarǵa arnalǵan demalý, tamaqtaný, meditsinalyq kómek kórsetý jáne týristik qyzmet kórsetý oryndary bar. 2026 jyldan bastap negizgi týristik baǵyttar jumys isteidi. Almatydan Quljaǵa, Dýlatyǵa jáne Shonjy arqyly ótetin baǵyttar boiynsha týristik tasymaldaý qosylǵan. Qyzmet sapasyn arttyrý úshin avtobýstar men jeńil kólikterdi daiyndadyq”, — deidi ol.
Sózinshe, avtovokzal týristerdiń shekaradan ótýin jyldamdatý úshin arnaiy baǵdarlamalardy engizip jatyr. Qazirgi tańda kompaniiada 20-ǵa jýyq qyzmetker jumys isteidi. Avtovokzaldyń qurylys jáne tehnika jabdyqtary jergilikti ákimdik pen oblystyq sport jáne týrizm basqarmasynyń qoldaýymen iske asyrylǵan.
Qorytyndylai kele, atalǵan aqparattyq týr barysynda qatysýshylar óńirdiń týristik áleýetimen tanysyp qana qoimai, jańa jobalardyń jolǵa qoiylǵanyna kóz jetkizdi.
