Naqtylap aıtsaq, óndirýshi kompanıanyń bıyl shyǵarǵan 90 myń vaksınasynyń úsh qutysynyń ishinen qaqpaqtyń synyǵy shyqqan. Aıtýlarynsha, elimizdiń densaýlyq saqtaý mekemeleri japonıalyq ekpeden bas tartyp otyr. Onyń ornyna Úndistannan «SERUM» atty ekpe ákelingen. Alaıda ony Qazaqstanǵa jetkizgenshe 2-3 aı ýaqyt ketedi, sonyń saldarynan elimizde jańa týǵan náresteler men 7 jasqa deıingi balalarǵa vaksına egý toqtatyldy.
– Almaty oblysynda jyl saıyn týberkýlezge qarsy 40 myńnan astam jańa týǵan náreste jáne 26 myńnan astam 6-7 jastaǵy balalar vaksınasıalanady. Ótken kezeńde oblysta 20 myńnan astam bala egildi, olardyń ishinde ımmýndaýdan keıingi qolaısyz kórinisterdiń kúrdeli jaǵdaılary tirkelgen joq, – dep atap ótti Almaty oblysynyń Taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Ashat Sákenuly.
Balalar jasy ınfeksıalyq aýrýlar úshin eń osal bolyp sanalady. Bul jetkiliksiz jetilýine jáne aǵzanyń jalpy tózimdiliginiń tómendeýine baılanysty. Vaksınasıa aǵzada arnaıy antıdenelerdiń túzilýi maqsatynda júrgiziledi, osylaısha kókjótel, sirespe, dıfterıa, týberkýlez, polıomıelıt, qyzylsha, qyzamyq, parotıt sıaqty aýrýlarǵa aǵzanyń qorǵanysh qyzmetin (ımýnıtet) kúsheıtedi.
– Balalaryna ekpe jasatýdan bas tartqandardyń kóbisi dinı kózqarastaǵy adamdar. Árıne, bul baǵytta oblys tóńireginde úlken jumystar jasalyp, arnaıy kezdesýler ótkizilip jatyr. Vaksına almaǵan balalar arasynda juqpaly aýrý túrlerin juqtyrǵandary da bar. Balalarynyń aýrý juqtyrǵanyn bilgennen keıin ǵana ata-analar ekpe jasatý jóninde oılap, ókinedi, – deıdi Ashat Sákenuly.
Búkil álemde ımýndyq-profılaktıka ınfeksıalarǵa qarsy kúresýde eń tıimdi, únemdi jáne qoljetimdi bolyp tanylǵan. Qazaqstanda 19 ınfeksıalyq aýrýǵa qarsy vaksınasıalaý júrgiziledi. Balalardy ımmýndaý úshin Dúnıejúzilik densaýlyq saqtaý uıymy sapaly vaksınalar satyp alynady eken.
Týberkýlezge qarsy vaksınasıalaý balalardyń arasynda týberkýlez menıngıti jáne dıssemırlengen týberkýlez sıaqty týberkýlezdiń aýyr jaǵdaılarynyń damýyna jol bermeýge múmkindik berdi.
Sońǵy 10 jyldyń ishinde týberkýlezben syrqattanýshylyq 1,7 esege (100 myń turǵynǵa shaqqanda 2008 jylǵy 77,69-dan 2018 jylǵy 44,73-ke deıin) tómendedi, ólim 4,3 esege (100 myń turǵynǵa shaqqanda 2008 jylǵy 5,6-dan 2018 jylǵy 1,3-ke deıin) tómendedi.
Bul derekter balalardy vaksınasıalaýdy qosa alǵanda týberkýlez boıynsha epıdemıologıalyq jaǵdaıdy turaqtandyrý boıynsha júrgizilip otyrǵan sharalardyń tıimdiligin rastaıdy.
B. JUMANBEKOVA
