2025 jylǵy 21 maýsymda Almaty oblysy, Kegen aýdanynyń kórikti Qarqara jaılaýynda dástúrli «Qymyzmuryndyq–2025» festıvali joǵary deńgeıde uıymdastyryldy. Bul mereke qazaq halqynyń tól sýsyny — qymyz óndirý mádenıetin dáripteýge, ulttyq salt-dástúrdi jańǵyrtýǵa baǵyttalǵan taǵylymdy sharaǵa aınaldy,- dep habarlaıdy Dalanews.kz
Festıváldiń ashylý saltanaty «Kegen» halyq teatrynyń teatrlandyrylǵan kórinisimen bastaldy. Qymyzmuryndyq rásimi aıasynda qulyndar jelige baılanyp, aýyldyń qyz-kelinshekteri kúbide qymyz pisip, bir tonna qymyz kelgen qonaqtarǵa tegin taratyldy. Qymyzdyń túr-túri usynylyp, qymyz daıyndaýdyń dástúrli tehnologıasy – pispekti tobylǵyǵa ystaý ádisi tanystyryldy. Qymyzhana ıelerine aqsaqaldar aq batasyn berip, izgi tilek jaýdyrdy.
İs-sharany Almaty oblysy ákiminiń orynbasary Nurlan Erǵalıuly ashyp, ulttyq dástúrge taǵzym etý — bolashaqqa baǵyt ekenin atap ótti. Sondaı-aq Qyrǵyzstannyń Ystyqkól oblysy, Túp aýdanynyń ákimi Qanybek Ábıev, Májilis depýtaty Janarbek Áshimjanov, eńbek ardageri Toqqoja Estenov jáne Jolan Omarovtyń ákesi Ybraıahyn aqsaqal kópshilikke quttyqtaý sóz arnady.
Merekege Qazaqstan halqy Assambleıasy Respýblıkalyq Analar keńesiniń tóraıymy Nazıpa Shanaı bastaǵan el óńirlerinen kelgen Analar keńesiniń tóraıymdary arnaıy qatysyp, urpaq tárbıesindegi ulttyq qundylyqtardyń mańyzyn aıqyndaı tústi.
Festıvál aıasynda ulttyq sport túrleri: aýdaryspaq, qyz qýý, jamby atý, teńge ilý, qoshqar kóterý, qazaq kúresi syndy oıyndar ótti. Qymyz ishýden jarys ta uıymdastyryldy — 15 kelilik ydyspen qymyz ishken qatysýshylarǵa syılyqtar tabystaldy. Aýdandyq okrýgter men mekemeler tikken kıiz úıler ult jaýharlarymen kómkerilip, naǵyz etnoaýyl kórinisin berdi.
Aýyl sharýashylyǵy tehnıkalarynyń kórmesinde «Belarýs Agro Tehnıka» saýda úıi zamanaýı tehnıkalardy tanystyryp, tıimdi lızıń sharttary boıynsha keńes berdi. Uıymdastyrýshylardyń aıtýynsha, mundaı kórmeler aýyl sharýashylyǵyn qoldap, tehnıkanyń jańarýyna serpin beredi.
🔹 2024–2028 jyldarǵa arnalǵan josparǵa sáıkes, mashına-traktor parkin jańartý kórsetkishi 2025 jyly 6,5%, 2030 jyly 10% bolýy tıis.
🔹 Bıyldyń ózinde 490 jańa tehnıka satyp alý josparlanǵan. Búginde onyń 181-i alynǵan — bul jospardyń 37%-yn quraıdy.
Festıvál aıasynda ótken «Jolan júırigi» respýblıkalyq at báıgesine elimizdiń túkpir-túkpirinen jáne Qyrǵyzstannan 150-ge jýyq tulpar qatysty. 9 shaqyrymdyq qunan báıgede Qyrǵyzstandyq Arsen Bolotbekov «Rokı» atty sáıgúligimen jeńiske jetse, 31 shaqyrymdyq Alaman báıgede Meıir Dáýletbaı minip shyqqan «Aıbalta» birinshi bolyp keldi. Júlde qorynda 2 Changan krosoveri jáne 10,5 mln teńge boldy.
Top báıgede Amangeldi Nurıslam «Qalqaman» tulparynyń tizginin ustap, ekinshi Changan krosoverin utyp aldy. Jeńimpazdarǵa aqshalaı jáne zattaı syılyqtar tabystaldy. Sonymen qatar, «Tolaǵaı» saıysynda alyptar kúsh synasyp, qoshqar kóterip, zil tasty ıyqqa alyp, merekeniń kórigin qyzdyrdy.
Merekelik konsertte QR jáne Qyrǵyzstannyń halyq ártisi, Memlekettik syılyq ıegeri Altynbek Qorazbaev, sondaı-aq «Alataý serileri», Ultý Qabaeva, Nurbolat Abdýllın, Beıbit Qorǵan, «Abyroı» toby óner kórsetti. «Súıinbaı sazy» men «Topjarǵan» toptary, jergilikti jyrshylar men aqyndar alańdy án men jyrǵa bólep, keshtiń mazmunyn tolyqtyrdy.
Bul festıvál – tabıǵatpen úndesken, el rýhyn kóteretin, urpaqqa ónege bolatyn ulttyq mereke ǵana emes, týrızm men aýyl ekonomıkasyn qoldaýdyń naqty kórinisine aınaldy. Ulttyq bolmysymyzdy ulyqtaıtyn Qymyzmuryndyq sekildi dástúrli sharalar jas urpaqtyń rýhanı jańǵyrýyna negiz bolary anyq.
