Almaty oblysynda jastardy jumyspen qamtý deńgeii joǵary. Ótken jyly 24 932 jas jumysqa turǵan. Osylaisha, NEET sanatyndaǵy jastar sany 26 186 adamǵa deiin tómendegen. Bul kórsetkish 2023 jyly 46 myńdy kórsetken edi, dep habarlaidy Dalanews.kz
Almaty oblysy jastar saiasaty basqarmasynyń basshysy Madi Ahmetovtyń aitýynsha, bul jumystar Qazaqstan Respýblikasy memlekettik jastar saiasatynyń 2023-2029 jyldarǵa arnalǵan tujyrymdamasy negizinde jalǵasyn tabady.
Bas qujatta kórsetilgen 7 negizgi baǵyt boiynsha Almaty oblysynda arnaiy is-sharalar jospary bekitilgen. Sonyń ishinde NEET sanatyndaǵy jastardy áleýmettendirý jumysyna den qoiylǵan.
«Biyl saýda oryndarynda resmi tirkeýsiz jumys jasap júrgen jastarǵa basymdylyq beriletin bolady. Oblys aimaǵyndaǵy barlyq saýda-sattyq oryndarynyń basshylyǵymen tiisti jumystar júrgiziledi. Atalǵan baǵyt boiynsha keminde 500 jastyń eńbek qatynasyn resmi tirkeitin bolamyz»,-deidi Almaty oblysy jastar saiasaty basqarmasynyń basshysy Madi Ahmetov.
Resmi derekterge súiensek, ótken jyly 217 jumyssyz jas kásiptik daǵdylaryn qalpyna keltirý úshin, al 1267 adam «Bastaý biznes» jobasy aiasynda qysqa merzimdi oqýdan ótken. Búgingi kúni 88 jastyń biznes-ideialary qoldaý taýyp, 400 AEK kóleminde qaitarymsyz grantqa ie bolǵan jaiy bar.
«Qazirgi tańda oblysta 2025 jylǵa jumys oryndaryn qurýdyń Óńirlik kartasy bekitildi. Qujatqa sáikes, 60 230 jumys oryny qurylsa, 18 744 jas jumysqa tartylady dep josparlanǵan»,-deidi Jumyspen qamtýdy úilestirý jáne áleýmettik baǵdarlamalar basqarmasynyń bólim basshysy Janserik Adiahmetov.
Jastar saiasaty tóńiregindegi keshendi sharalar munymen shektelmeidi. Biyl «Saqtan» jáne «Adal adam – adal eńbek» jobalary iske asatyn bolady.
Budan bólek, jastarǵa zamanaýi HAB ashý kózdelgen. Jospardy júzege asyrýǵa demeýshiler yqpal etpek. Sonyń nátijesinde Talǵar aýdany, Panfilov aýylyndaǵy mádeniet úii qaita jańaryp, jastarǵa arnalǵan biregei ortalyqqa ainalmaq.
«Jalpy, biyl jastardy qoldaýǵa baǵyttalǵan 12 tarmaqtan turatyn keshendi jospar bekitildi. Jyl sońyna deiin barlyq sharalar aiasynda tikelei 100 myń jasty, janama túrde 300 myń jasty qamtý kózdelip otyr»,-dep qorytyndylady Madi Ahmetov.
Eske salaiyq, NEET (not in Education, Employment, or Training) sanatyna 14 pen 35 jas aralyǵyndaǵy (qosa alǵanda) «jumyssyz jáne oqýsyz» mártebesi bar, sondai-aq kásiptik daiarlyqtan ótpeitin jastar jatady.
