Almaty oblysynyń ákimi Marat Sultanǵaziev aimaqtaǵy Nazarbaevtardyń qazirgi róli týraly aitty, - dep habarlaidy Dalanews.kz.
"Almaty oblysynda munai, ken, qarjy salasy, bankter de joq. Aimaqta transulttyq, úlken kompaniialar bar nemese orta biznes damyǵan. Sondyqtan oblysta oligarhtar emes, orta deńgeidegi kásipkerler",- deidi ákim Erbol Seilkhan iýtýb arnasyna bergen suhbatynda.
Sonymen qatar, Sultanǵaziev "oblystaǵy mańyzdy taǵaiyndaýlar Nazarbaevtardyń maquldaýymen júrgiziledi" degen pikirge qatysty oiyn aitty.
"Jalpy qyzmetkerlerdi taǵaiyndaýdyń tártibi bar. Saiasi qyzmetti taǵaiyndaý úshin ortalyq organnyń kelisimi bolýy kerek, tájiribesi bolýy kerek. Keiinnen ony prezident ákimshiligi qaraidy. Oblystyń birinshi basshylary solai taǵaiyndalady. Ákimdikte orynbasarlar, aýdan ákimderi sondai kelisimnen ótedi. Basqarmadaǵylardy taǵaiyndaý úshin sala ministrliginiń kelisimin alý kerekpiz", - deidi Marat Sultanǵaziev.
Sondai-aq suhbat barysynda Marat Sultanǵaziev Zamanbek Nurqadilovtiń Kegendegi biýstiniń ashylýyna nege barmaǵanyn túsindirdi.
"Men qańtar aiynda ol kisiniń asyna qatysqanmyn. Dúisenbi - jumys kúni boldy, artynsha úkimet otyrysy boldy. Iaǵni jumys kestesine bailanysty bara almadym. Biraq orynbasarym boldy",- deidi ákim.
Odan bólek, ákim Sherzat Bolattyń úii órtenip ketkennen keiin onyń otbasyna úi berý máselesi týraly pikirin aitty.
"Úi órtengennen keiin oblystaǵy metsenattar kómek berdi. Ol ákimdik tarapynan uiymdastyrýmen boldy. Biz otbasyna úi jaldaýdy usyndyq. Alaida olar "jaldaýdyń qajeti joq, jaqynda ata-anamyz turady, sol jerden shyǵaramyz" dedi. Úi salý boiynsha: biz usynys jasadyq, aýdan ákimi sóilesti, olar úi máselesin kóktemge deiin qaldyrýdy usyndy. Ol da durys shyǵar. Sebebi qazir tergeý júrip jatyr, arnaiy organdar, onyń ishinde TJD saraptama júrgizdi. Biraq qysta jai otyra bermei, úidiń salynýy qujattaryn rettei bastaý boiynsha aýdan ákimderine tapsyrma berdim", - deidi Marat Sultanǵaziev.
Oblys ákimi úi salý máselesin Sherzattyń otbasy kóktemge deiin qaldyrýdy usynǵanyn taǵy da atap ótip, sol ýaqytta órtengen úidiń ornyna jańa baspana salynatynyn aitty.
