Almaty oblysynda Jumysshy mamandyqtar jyly aıasynda hımıalyq ónim shyǵaratyn kásiporynǵa kolej stýdentteriniń tanymdyq ekskýrsıasy ótti, dep habarlaıdy Dalanews.kz

30-dan astam stýdent Qonaev qalasynda ornalasqan «Baǵashar Meken» zaýytyna baryp, óndiristik sehtardyń, zerthanalardyń jumysyn kórip, sapany baqylaý júıesimen tanysty.

Sapar barysynda kolejder, kásiporyn jáne «Jastar Rýhy» uıymy arasynda úshjaqty yntymaqtastyq týraly memorandýmǵa qol qoıyldy. Qujat aıasynda stýdentterdiń óndiristik tájirıbeden ótýi men úzdik túlekterdiń jumysqa ornalasýyna múmkindik berý kózdelgen.

«Bizdiń maqsatymyz – jastardyń teorıalyq bilimmen qatar naqty óndiristik ortada tájirıbe jınaýyna jaǵdaı jasaý. Jas mamandardy turaqty jumys oryndarymen qamtamasyz etý – «AMANAT» partıasynyń basty mindetteriniń biri», – dedi «Jastar Rýhy» uıymynyń Almaty oblystyq fılıalynyń tóraǵasy Medet Bekbergenov.

«Baǵashar Meken» JSHS – Qazaqstandaǵy antıfrızdi ónerkásiptik negizde óndiretin jalǵyz kásiporyn. Zaýyttyń qýattylyǵy jylyna 25 myń tonna ónim shyǵarýǵa jetedi. Ónim ishki naryqpen qatar Reseı, Ózbekstan jáne Qyrǵyzstanǵa eksporttalady. Kásiporynda 200-ge jýyq adam jumys isteıdi, olardyń basym bóligi – jergilikti turǵyndar.

Jyl basynan beri «Jastar Rýhynyń» bastamasymen oblys aýmaǵyndaǵy alty óndiristik nysanǵa ekskýrsıa uıymdastyrylyp, 100-den astam stýdent qamtyldy.

Jyl sońyna deıin taǵy 20 kolejben memorandýmǵa qol qoıylyp, 500-den astam stýdentke óndiristik tájirıbeden ótip, jumysqa ornalasý múmkindigi usynylady dep josparlanýda.