Al İle aýdanynyń ákimi baspanaly bolǵan jandarǵa turmystyq tehnıka tartý etti, – dep habarlaıdy –«Almaty» arnasy.
Aıta keteıik, áleýmettik sanatqa jatatyn turǵyndarǵa páter qyzyl kirpishten turǵyzylǵan jańa úılerden berildi.
Qaıyrymdy kásipker aýdandaǵy az qamtylǵan januıalarǵa jasalatyn jaqsylyq munymen bitpeıdi dep otyr.
Sý jańa páter kiltine ıe bolǵandardyń biri – bes balanyń anasy Elmıra Keńshilbaeva.
Kúıeýiniń 45 myń teńge jalaqysy men múgedek balalaryna memleket tarapynan beriletin 80 myń teńgege kún kórgen bul otbasy 14 jyldan beri páter jaldap turǵan.
Birde jetse, birde jetpeı áýpirimdep kún kórgen olarǵa jany ashyǵan aýdan ákimi jomart kásipkerlerden kómek suraǵan.
«Múgedek balam bar. Bir páterden ekinshisine kóship júrdik. Kún kórisimiz qıyndap ketken bolatyn. Kúni keshe ǵana páteraqyny 2 aı tóleı almaǵandyqtan, balalarymdy alyp, ákimge bardym. Aldyńǵy eki ákimnen esh qaıyr bolmap edi, jańa ákim kele salyp, osylaı jarylqap jatyr», – deıdi qýanyshtan kóz jasyn tyıa almaǵan Elmıra Keńshilbaeva.
Al taǵy eki bólmeli páter 9 jyldan beri úı kezegin kútip júrgen Dabysbaevtarǵa buıyrdy.
Aýdan ortalyǵynan 120 shaqyrym qashyqtyqtaǵy Aqshı aýylynda turyp kelgen múmkindigi shekteýli jandar endi Boraldaı kentindegi 48 sharshy metrlik páterge kóshedi.
«Qyzymyz da, áıelim ekeýmiz de múgedekpiz. Sol úshin aýdan ortalyǵy nemese osy Boraldaı kenti sıaqty úlken aýrýhanasy bar jerden úı suraǵanbyz. Mine, búgin armanymyz oryndaldy. Qýanyshtymyz. Kóp rahmet», – deıdi otaǵasy Adaı Dabysaev.
Eki páterdi qanshaǵa satyp alǵanyn jasyrǵan kásipker jaqsylyq jasaý áli de jalǵasady deıdi.
Memleket bıznespen aınalysyp, tabys tabýǵa múmkindik bergendikten, halyqqa qaıyrymdylyq jasaý – ár kásipkerdiń azamattyq mindeti deıdi ol.
«İle aýdanyndaǵy biraz kásipker kóp balaly analarǵa, múgedek jandarǵa kómekteseıik dep sheshtik. Sebebi eń bastysy ata-ana men bala toq bolsa, elimizde bári jaqsy bolady», – deıdi qurylys kompanıasynyń prezıdenti Amangeldi Ataev.
Óz qaramaǵyndaǵy turmysy tómen otbasylarǵa kásipkerlerdiń kómektesýine muryndyq bolǵan ákim baspanaly bolǵan qos otbasyna teledıdar syılady.
Jalpy, İle aýdanynda 11 sanat boıynsha 3056 adam úı kezeginde tur. Páterge zárý jandardyń sanyn azaıtý maqsatynda aýdan aýmaǵynda 300 páterli kópqabatty úılerdiń qurylysy bastalmaq.
