Almaty oblysy Ile aýdanyndaǵy Muhamedjan Túimebaev aýylynda ornalasqan №20 orta mekteptiń jertólesin taǵy sý basyp, ata-analar dabyl qaǵýda. Milliardtan astam qarjy jumsalyp, jýyrda ǵana qoldanysqa berilgen bilim ordasynyń qazirgi jaǵdaiy jurtshylyqtyń narazylyǵyn týdyrdy, dep habarlaidy Dalanews.kz.
Almaty.tv Ile aýdanynyń bas aýrýyna ainalǵan mektepten taǵy shý shyqqany týraly reportaj ázirlegen. 900 oqýshyǵa arnalǵan mektep biyl qyrkúiekte bir jyldyq jóndeýden keiin qaita ashylǵan. Alaida arada birneshe ai ótpei jatyp, jertóle sýǵa tolyp, qabyrǵalar syz tartyp, ashyq jatqan elektr symdary men ylǵal dálizder paida bolǵan. Ata-analar túsirgen beinejazbalarda mektep ishindegi qaýipti jaǵdai anyq kórinedi.
Aýyl turǵyndarynyń aitýynsha, jóndeý jumystary asyǵys ári sapasyz júrgizilgen. Qabyrǵalar jarylyp, ǵimarattyń qaýipsizdigine kúmán týyndaǵan. Balalary osy mektepte oqityn ata-analar arnaiy komissiia shaqyryp, nysandy tolyq tekserýdi talap etýde.
Merdiger kompaniia ókilderi sýdyń kárizden emes, jer asty sýlarynyń kóterilýinen shyqqanyn aitady. Al bilim bólimi naqty sebepti áli anyqtai almaǵanyn málimdedi. Resmi derekke sáikes, mektep ǵimaraty buǵan deiin apatty dep tanylyp, aýdan ákimdiginiń teńgerimine ótken. Keiin seismokúsheitý jáne qalpyna keltirý jumystaryna bir milliard teńgeden astam qarjy bólingen. Bul týraly Dalanews arnaiy material jariialaǵan.
Ile aýdany ákimdiginde nysan áli tolyq qabyldanbaǵanyn, anyqtalǵan kemshilikter boiynsha merdiger kompaniiaǵa sot arqyly talap qoiylǵanyn habarlady. Qazir jertóledegi sýdy drenajdyq júie arqyly soryp shyǵarý jumystary júrgizilýde. Alaida bul ázirge ýaqytsha sheshim ǵana.
On jyl buryn salynǵan mekteptiń qaita jóndeýden keiin de sapasyz kúide qalýy – ata-analardyń basty alańdaýshylyǵy. Al jaýapty organdar máseleni tolyq tekserip, qosymsha saraptama júrgizýge ýáde berip otyr.
