Ile aýdany Almaty oblysy ákiminiń kýbogy úshin fýtboldan birinshi oblystyq týrnirdiń arenasyna ainaldy. Saiysqa oblystyń barlyq aýdany men Qonaev qalasynan 10 komanda qatysty, dep habarlaidy Dalanews.kz.
Jarystyń saltanatty ashylý rásiminde Almaty oblysynyń ákimi Marat Sultanǵaziev sóz sóiledi. Ol Memleket basshysy Qasym-Jomart Toqaevtyń tapsyrmasy boiynsha oblysta buqaralyq sportty damytý úshin barlyq jaǵdai jasalyp jatqanyn atap ótti.
"Bizdiń oblysta fýtbol joǵary deńgeide damyp keledi. Bir jarym jyl buryn oblys ortalyǵynda ár aýdanynda filialdary bar bolashaq kásibi fýtbolshylardy daiyndaityn arnaiy balalar men jasóspirimder sport mektebi ashyldy. Sondai-aq bizde Qazaqstannyń ekinshi ligasynda oblystyń namysyn qorǵaityn "Ile-Alataý" kásibi klýby paida boldy", - dedi oblys basshysy.
Sultanǵazievtiń aitýynsha, oblysta zamanaýi sporttyq nysandar salynyp, materialdyq-tehnikalyq baza jańartylýda. "Búgingi tańda oblystyń ár aýdanynda 10 dene shynyqtyrý-saýyqtyrý kesheni jumys isteidi", — dep tolyqtyrdy sózin oblys ákimi.
Ákim týrnir qatysýshylaryna sáttilik pen aitýly jeńister tiledi.
"Sporttyq jarystar minezdi shyńdaidy, komandalyq rýh pen maqsat qoia bilýge tárbieleidi. Sizderdiń daiyndyqtaryńyzdyń joǵary deńgeii men sporttyq sheberlikterińizdi kórsetetinińizge senimdimin!"
Týrnir olimpiadalyq júie boiynsha (shyǵý arqyly) ótti. Finalda Qonaev qalasynyń komandasy Kegen aýdanynyń oiynshylaryn jeńip, 1-oryndy ielendi. Úshinshi oryndy Ile aýdanynyń ókilderi aldy.
Týrnir uiymdastyrýshylary fýtboldy jyl saiyn ótkizetin is-sharaǵa ainaldyryp, biriktirýshi faktor retindegi mańyzy zor ekenin tilge tiek etti.
