Almaty oblysynda bilim basqarmasynyń basshysy Saltanat Baspaeva men ishki saiasat basqarmasynyń basshysy Erik Ábit qyzmetinen bosatyldy. Shendilerdi laýazymynan aiyrý týraly sheshim Baǵanashyldaǵy jetim balalardy balalar úiiniń májbúrlep shyǵarýǵa bailanysty qoǵamdyq rezonans týdyrǵan oqiǵadan keiin qabyldanyp otyr, dep habarlaidy Dalanews.kz.
Saltanat Baspaeva atalǵan laýazymyn 2022 jyldyń maýsym aiynan bastap atqaryp keledi. Oǵan deiin ol Eńbekshiqazaq aýdanynyń ishki saiasat, mádeniet, tilderdi damytý jáne sport bóliminiń bastyǵy bolyp jumys istegen. Al Erik Ábitov 2024 jyldyń sáýir aiynan bastap ishki saiasat basqarmasyna basshylyq etedi. Oǵan deiin ol "Esikgeosáýlet" KMK direktory jáne oblystyq máslihattyń depýtaty bolǵan.
Aita ketsek, 2025 jyldyń kókteminde Almaty qalasynyń biligi "Baǵanashyl" balalar úiiniń tárbielenýshilerin Qonaev qalasyna kóshirý týraly sheshim qabyldaǵandaryn málimdedi. Buǵan ǵimarattyń eskirýi túrtki degen sebepti de alǵa keltirdi. Balalarǵa jańa oryn aldyn-ala daiyndalyp qoiylǵany da aityldy. Alaida, balalardyń aitýynsha, aidaladaǵy nysanda, tipti taza sý da bolmaǵan. Oqýshylardyń ózderi kóshýge qarsylyq tanytty.
Soǵan qaramastan 21 shildede "Baǵanashyl" balalar úiiniń tárbielenýshilerin Almatydan Qonaevqa kóshirý bastaldy, onyń arty úlken daýmen tynǵany belgili. Jelide májbúrli kóshirý kezinde túsirilgen video jariialanǵan keiin prezident Qasym-Jomart Toqaev bul protsesti toqtatyp, al balalar úiiniń ǵimaratyn jóndeýdi tapsyrdy. Qazir Prezident Ákimshiligi qyzmettik tergeý sharalaryn júrgizýde.
Kúni keshe Almaty qalasynyń ákimdigi balalar úiiniń tárbielenýshileri óz ornynda qaldyrylyp, Almatyda oqýlaryn jalǵastyratynyn málimdedi. Al balalar úiiniń ǵimaratyna jańǵyrtý jumystary kelesi jyly qolǵa alynatyn boldy.
"Balalardy bólip-jarmaimyz. Tárbielenýshiler Almatyda qai mektepterde oqyp júr, sol bilim ordalarynda oqýyn jalǵasatyn bolady. Balalardyń Qonaev qalasyna kóshirý qarastyrylmaidy", delingen ákimdik habarlamasynda.
